A Cuira datti dapi l'onn 2018 var 650 uffants dapli ch'èn obligads d'ir a scola, cumpareglià cun ils onns avant. Var 100 da quels èn vegnids da l'Ucraina e van uss a scola a Cuira. Tras la fusiun cun las vischnancas da Haldenstein, Maladers e Tschiertschen-Praden frequentan era var 150 scolaras e scolars dapli la scola da la citad da Cuira. Ils ulteriurs 400 uffants pon ins attribuir a dapli naschientschas durant ils ultims onns.
Mancanza da persunas d'instrucziun
Pervi da quests 650 scolars supplementars dovri era dapli persunas d'instrucziun, di Patrik Degiacomi envers il schurnal regiunal da SRF.
Fin ussa chattain nus avunda persunas d'instrucziun qualifitgadas
Tenor in rapport dal cussegl da la citad saja quai dentant gia oz daventà bler pli difficil da chattar persunas d'instrucziun qualifitgadas. Adina dapli plazzas na possian betg pli vegnir occupadas, ed era las annunzias per plazzas libras sajan sa reducidas per radund trais quarts.
Novs edifizis da scola
L'onn 2022 han ins cumenzà a construir l'edifizi da scola e da sport «Fortuna» a la Ringstrasse. Quel duai remplazzar la chasa da scola primara «Daleu» sco era la chasa da la scola secundara, «Florentini». Ultra da quai vegnan las classas da talents er integradas en la chasa da scola Fortuna. Fin ussa vegnan quellas anc instruidas en la chasa da scola Giacometti. Il project Fortuna sa chatta actualmain en la fasa finala e duai gia esser pront sin la fin da la stad, vul dir per il proxim onn da scola.
Il plan era che las chasas da scola possian vegnir messas ensemen e ch'ils lieus vegls «Daleu» e «Florentini» na vegnian betg pli duvrads. Tenor Patrik Degiacomi na saja quai per il mument dentant anc betg pussaivel cunquai ch'ins haja retard pervi dals auters bajetgs en construcziun.
En l'avegnir vegnan las localitads Daleu e Florentini anc duvradas provisoricamain. La nova chasa da scola Florentini n'è betg memia pitschna, mabain ils dus auters fabricats han retard.
Tar ils projects da construcziun retardads
Sin l'areal da la caserna planisescha la citad da Cuira ina nova chasa da scola. La cumpra dal bain immobigliar è però vegnida franada, perquai che la Confederaziun blochescha actualmain tut las fatschentas pervia da mesiras da spargn.
Punctual essan nus en ina gronda miseria, ma nus chattain adina puspè soluziuns.
Il project da la chasa da scola Masans è tenor Patrik Degiacomi sa mussà sco pli cumplitgà. Differentas dumondas èn stadas en il center. Tranter quellas sche la chasa da scola è en il dretg lieu, e sch'ella porschia avunda spazi? Suenter dialogs cun partenaris ed il chantun è il cussegl da la citad vegnì a la conclusiun ch'il lieu saja gist, ma ch'ins dovria dapli spazi. Cun cumprar in terren vischinant possian ins ussa dentant cumenzar a planisar.
