Quest fatg che ils uffants e la magistraglia ston far plazza fa mal il venter al president da l'Uniun Rumantscha Patric Collet. Surtut perquai ch'i dat entant nagina soluziun fixa. I saja surtut ina sfida per la magistraglia che vegniss stratga or d'in conturn da lavur.
Scolasts e scolastas pendan betg vid las plantas uschia ch’ins po simplamain racoltar ellas.
L'Uniun Rumantscha ha tema che la magistraglia na veglia betg far quest pass e che la scola bilingua haja atras quai alura memia pauc persunal d'instrucziun.
Blers uffants en ils quartiers
Il suprastant da la citad da Cuira e responsabel per las scolas, Patrik Degiacomi, chapescha ils quitads. Dentant saja quai necessari da spustar la classa bilingua dal Lachen en in auter lieu. En il quartier enturn il Lachen dettia numnadamain dapli uffants che dovran plazza en scola.
Vitiers vegn che las scolas en vischinanza, Masans e Monatlin, han era gronds augments d'uffants che han per part da vegnir tramess en la chasa da scola Lachen. Pia sto la scola bilingua rumantsch-tudestga tenor Patrik Degiacomi vegnir plazzada là nua ch'i ha spazi e betg là nua che la plazza è stgarsa.
Paucas pussaivladads
La citad da Cuira haja examinà bleras differentas opziuns. Era resguardà ils uffants che vegnan ils proxims quatter fin tschintg onns en scola en mintga quartier. Bleras variantas na sajan dentant gnanc pussaivlas. Entant stat ina soluziun pussaivla sin maisa, questa è dentant anc betg segira.
La varianta che stat davanttiers è anc betg decidida. Dentant fiss quai la soluziun che la chasa da scola Florentini vegn puspè prendì en funcziun per la scola bilingua.
Questa chasa da scola è numnadamain vegnida prendida ord funcziun perquai che la nova chasa da scola Fortuna è vegnida bajegida. Il spazi en il Florentini vegniss dentant era duvrà da la scola commerziala u dals pumpiers. Pervia da quai è Patric Collet da l'Uniun Rumantscha sceptic, tenor el dovrassi ina soluziun a lunga vista per la scola bilingua e betg che questa stoppia adina puspè far midada. Ina schanza vesa el dentant tar il Florentini, là avessi plaz avunda per metter ensemen la scola bilingua cun la scolina. Ils quitads èn dentant pli gronds: sche la magistraglia manca ed i dat nagin lieu a lunga vista, perda la scola bilingua attractivitad. Sche geniturs na tramettessan betg pli lur uffants en questas classas, alura tema l'uniun per l'entira purschida.
Citad sto spargnar 3 milliuns tar las scolas
Fin cura che las scolaras e scolars pon anc ir a scola en il Lachen n'è anc betg cler. Ina decisiun vegni a dar suenter che la citad ha schlià la sfida da spargnar. En il rom d'in pachet da spargn da diesch milliuns francs ston circa trais milliuns francs vegnir spargnads tar la furmaziun. E Patrik Degiacomi di ch'el na sappia anc betg danunder ch'el duess striunar natiers quests 3 milliuns... Mintga partiziun pudess esser pertutgada, surtut partiziuns che n'èn betg in stuair tenor lescha. E las scolas bilinguas a Cuira – la rumantscha sco era la taliana – èn purschidas supplementaras.
Or da l'archiv:
