Scolaziun pretensiusa: Mintga quart na dumogna betg
La scolaziun tar il guid da muntogna è tant per il corp sco era per la psica fitg pretensiusa. Ils aspirants sin il diplom federal ston sco emprim dumagnar in examen d'admissiun e silsuenter ir trais onns a scola. Durant la scolaziun passentan els differents moduls d'enviern e da stad. La scolaziun tar il guid da muntogna cumpiglia differents aspects, tranter auter:
- fitness e cundiziun
- tecnica da raiver
- senn d'orientaziun
- leger cartas
- abilitad da manar ina gruppa
- communicaziun
Che la scolaziun è fitg pretensiusa demussan era las cifras da l'Uniun da guids da muntognas da la Svizra:
Avant bun 10 onns dumagnavan circa 50-60% dals aspirants sin far guid da muntogna la scolaziun. Ozendi è la quota tar 75% – mintga quart na dumogna pia betg la scolaziun tar il guid da muntogna.
Sin l'emprima egliada lucrativ, ma...
Sch'ins ha lura ina giada dumagnà la scolaziun paran las cifras da tradir ch'ins gudogna bain sco guid. Tenor l'Uniun grischuna dals guids da muntogna è la paja directiva tar var 645.- il di. Sch'ins mira dentant pli exact, nua che quels daners van tut, sa relativescha l'emprima impressiun:
Bain in terz dals daners van davent per segiradas. Plinavant lavura il guid da muntognas tar lungas turas sur 12 uras il di. E cun las entradas en la stagiun auta sto il guid era pudair supportar temp, nua ch'i na marscha betg uschè bain pervi da l'aura u auters facturs.
Guid da muntogna vegnan ins la fin finala betg pervia dals daners, mabain perquai ch'ins è gugent en las muntognas cun autra glieud.
Lavurar 100% sco guid n'è betg uschè savens
Blera lavur sco guid han ins l'enviern (december fin avrigl) e la stad (zercladur fin settember). Igl è dentant er pussaivel da lavurar l'entir onn sco guid da muntogna, sch'ins va tranter las stagiuns anc en l'exteriur a guidar turas.
Però na lavuran betg blers l'entir temp sco guid, quai n'è betg derasà. Ils blers han anc ina segunda clamada, sco per exempel pur, giurist u scrinari. Uschia vegnian ins era da passentar pli bler temp a chasa, cunquai ch'ins è bleras giadas, cura ch' ins fa turas, era betg las sairas a chasa e dorma en chamonas.
RR actualitad 07:00
