Digitalisada vegn la posta fisica ch'arriva uss anc sin palpiri tar la banca. Posta che vegn exnum duvrada fisica, sco tscherts contracts, vaglias u cartas, na vegn betg digitalisada, scriva la banca chantunala. Concret vegn la posta sviada a la Swisscom. La Swisscom digitalisescha la posta e trametta vinavant quella sin via electronica a las persunas adressadas. La digitalisaziun permetta d’esser pli effizient argumentescha la GKB.
Critica interna
L’intent da la banca chantunala da digitalisar la posta tras la Swisscom ha chaschunà critica interna ch'è vegnida purtada tar RTR: Ins tema che il secret banca na possia uschia betg vegnir garantì. RTR ha confruntà l’incumbensà federal per la protecziun da datas (EDÖB) cun la critica sco era la Surveglianza federala dal martgads da finanzas (FINMA).
Tenor las instituziuns n’è la collavuraziun da bancas cun terzs nagin problem entant che las bancas sa tegnan vi da las regulaziuns. Uschia sto la banca garantir er en la collavuraziun cun terzs che las datas vegnan tractadas cun las medemas pretensiuns da protecziun sco ch’era la banca tracta quellas.
L’otusourcing è admess, sche la banca tscherna precaut il partenari, instruescha e surveglia quel. La responsabladad resta tar la banca ed en spezial sto la banca garantir adina la confidenzialitad e la segirezza da las datas da la clientella. L'institut sto identifitgar, survegliar, quantifitgar e diriger las ristgas che resultan.
Il servetsch da la Swisscom per digitalisar la posta da las bancas datti dapi divers onns, scriva la Swisscom. Tut las datas restan en Svizra e tut las regulaziuns per la protecziun da datas e per il secret da bancas vegnian accumplids. Las datas vegnan tractadas segir e confidenzial.
La Banca Chantunala Grischuna scriva che las persunas tar la Swisscom che lavuran per il servetsch èn suttamessas al secret da bancas e che surpli vegnan regladas cleras mesiras organisatoricas e tecnicas cun contracts per segirar la confidenza da las datas. Quai conferma era la Swisscom envers RTR.
Societad digitala crititgescha AGB
Sche tut va tenor regulaziuns n’è l’outsourcing da la posta era betg per la societad digitala in problem, di il pledader da la societad Martin Steiger. La societad digitala è in'uniun che s’engascha per la protecziun da consumentas e consuments en il sectur digital.
Martin Steiger ch'è advocat spezialisà per il dretg en il spazi digital vesa dentant in auter punct ch’è pli dispitaivel. Numnadamain sa distgargian diversas bancas en las cundiziuns generalas tranter auter da l’obligaziun dal secret da bancas. Era la GKB:
«Organen, Angestellten und Beauftragten der GKB obliegen auf Basis von Datenschutz, Bankkundengeheimnis und weiteren Vorschriften verschiedene Geheimhaltungspflichten. Der Kunde entbindet hiermit die GKB von diesen Geheimhaltungspflichten und verzichtet auf das Bankkundengeheimnis, soweit dies zur Wahrung berechtigter Interessen der GKB notwendig ist, insbesondere […] bei Auslagerung von Geschäftsbereichen und Nutzung von Cloud-Dienstleistungen, soweit Kundendaten ins Ausland gelangen und ausländische Behörden nach Massgabe des ausländischen Rechts deren Herausgabe anordnen oder darauf zugreifen.»
Confruntada cun la dumonda daco ch’ins mettia en quella clausula di la GKB che quai saja ina formulaziun che saja normala en la branscha. Ins n’haja era betg externalisà secturs da coc da la fatschenta sco per exempel il traffic da pajaments. Enavant n’è era betg planisà insatge sumegliant.
Tenor la banca chantunala vai tar quella clausula sulettamain per segirar la banca per l’outsourcing da servetschs d'informatica che ston vegnir dads a l'exteriur perquai che alternativas mancan. Per exempel tar divers servetschs da Microsoft.
La GKB fa attenziun da collavurar cun partenaris professiunals, renumnads e verifitgads detagliadamain sco era da tegnair en Svizra en spezial datas da banca, datas suttamessas al secret da bancas e datas relevantas per la protecziun da datas. Uschia è la segirezza da las datas garantida. Las datas da las clientas e dals clients e lur segirezza èn centralas per la GKB.
Tar clausulas da singulas bancas na vul l’incumbensà federal per la protecziun datas betg prender posiziun, dentant scriva quel pertutgond la protecziun: I sa tschenta la dumonda, en tge mesira ch’ina tala clausula po insumma abolir l'obligaziun da la banca da respectar la lescha per la protecziun da datas. Pertge che questa obligaziun na consista betg sin basa d'in contract cun la clienta u il client, mabain sin basa d'ina lescha.
Ed era la surveglianza dals martgads da finanzas remartga sch'i na possia betg vegnir garantì da proteger las datas per exempel pervi da leschas en l’exteriur stoppian las bancas prender mesiras adattadas per reducir ils ristgs e metter a disposiziun infurmaziuns transparentas a lur clientas e clients. E quai fetschia la GKB, di la banca envers RTR.
Fiduzia en banca
Tranter persunas dal fatg dettia discussiuns pertutgond la legalitad da las clausulas, di Martin Steiger da la societad digitala. Auter che per exempel en Germania na pon organisaziuns da consuments betg far plant en num da quels – en Svizra sto mintgin sa defender sez e per il pli na valia quai betg la paina di Martin Steiger, uschia che la fin èsi ina dumond da fiduzia envers la banca ed en la surveglianza dals martgads da finanzas.