Victualias segiras – da la stalla enfin sin il plat. Uschia statti scrit sin la pagina da l’Uffizi chantunal per la segirezza da victualias e per la sanadad d’animals. La lavur en connex cun la sanadad d’animals finescha tranter auter tar il mazler, nua che la lavur da la segirezza da victualias cumenza.
Nus avain radund 100 differentas categorias d’affars, che nus controllain.
L’uffizi controllescha tut ils affars e las butias ch'han in connex cun victualias – da brassarias da café, latgarias e funtaunas, sur mazlarias e detaglists enfin tar la gastronomia che cumpiglia la gronda part. I va per controllar l’igiena en quatter champs: las premissas dal local, ils process igienics tar producziun e preparaziun, la magasinaziun e l’atgna controlla dals process. Per mintga champ datti ina nota dad 1 (fitg bun) enfin 4 (fitg schlet). A la fin suonda lura anc ina nota finala.
Il labor e ses apparats
-
Bild 1 von 4. Il labor per testar victualias. Bildquelle: RTR.
-
Bild 2 von 4. In apparat per testar la qualitad d'aua. Sin las plattafurmas vegn in filter e sin quel in cup. L'aua vegn tschitschada tras il filter, sin quel restan be ils scherms. Bildquelle: RTR.
-
Bild 3 von 4. Buttiglias per provas d'aua. Las buttiglias èn sterilisadas e numeradas. Bildquelle: RTR.
-
Bild 4 von 4. Dus apparats per testar la qualitad d'aua a moda automatica. Tuts dus pon vegnir adattads per testar differentas sorts d'aua. Bildquelle: RTR.
Controllas sut premissas scientificas
Provas prendan controlladras e controlladers be sch’i dat indicaziuns ch'il standard igienic na pudess betg esser cuntentaivel. Per ina prova vegn prendì ina tscherta quantitad dal product manglus. Quella vegn alura transportada en il labor sut cundiziuns ch'èn adattadas al product. La prova duai numnadamain vegnir testada en la medema cundiziun sco ch’ella è vegnida chattada, per betg falsifitgar il resultat. En il labor survegn mintga prova in numer unic per identifitgar ella. La prova vegn alura analisada uschè spert sco pussaivel en ina furma omogenisada.
Colurs da bacterias ed agids da transport
-
Bild 1 von 5. Prova cun streptococcas. Bildquelle: RTR.
-
Bild 2 von 5. Prova cun salmonellas. Bildquelle: RTR.
-
Bild 3 von 5. Provas d'aua en differentas qualitads. L'emprima (da senester) è l'unica prova che accumplescha las premissas (naginas colonias da bacterias). La segunda ha paucas colonias (puncts blaus). La terza ha fitg bleras colonias da bacterias. Bildquelle: RTR.
-
Bild 4 von 5. Trucla da sfradar per il transport da provas. Bildquelle: RTR.
-
Bild 5 von 5. Apparat per mesirar temperatura sur temp. L'uschenumnà «Temperatur-Logger» è adina tar la prova e mesira sur il temp sche la prova è adina tar la temperatura giavischada. Bildquelle: RTR.
La frequenza da las controllas è prescritta da la Confederaziun. Tar mintga categoria datti protocols e valurs che ston vegnir resguardadas.
Las controllas succedan senza annunzia. Il manaschi duai vegnir testà durant cundiziuns regularas. Era la discreziun è obligaziun, declera Matthias Beckmann. Resultats generals, sco bilantschas annualas pon consumentas e consuments dentant leger sin la pagina d’internet da l’uffizi.
Tut tenor rapport datti ina segunda schanza
Tut tenor il resultat da las controllas ston gastronomas e possessurs da butias curreger ils champs manglus. Da pulir, sur midar or mobiglia enfin mesiras da sanaziun datti diversas lezias cun differents termins per ina controlla superiura.
Nus avain la finamira cuminaivla da proteger consumentas e consuments e da betg stuair serrar manaschis.
Sche l’Uffizi per la segirezza da victualias e la sanadad d’animals fa bain sia lavur cun ils manaschis testads, na vesa la consumenta u il consument en il meglier cas nagut da quella lavur.