Fitg bunas notas per las victualias, l'aua da baiver sco er da duscha e da bogn per ils manaschis grischuns e glarunais – quai è il resultat dal nov rapport davart las controllas uffizialas ch'èn vegnidas fatgas l'onn passà. Da tut ils manaschis ch'èn vegnids controllads han 93% survegnì ina fitg buna u buna valitaziun da l'Uffizi per la segirezza da victualias e per la sanadad d'animals. Controllà èn tranter auter vegnids manaschis che produceschen victualias e manaschis da gastronomia.
Il Grischun e la Glaruna han en tut 5'469 interpresas da victualias registradas, 642 provediments d'aua da baiver e manaschis da bogn e 222 manaschis che mettan en circulaziun chemicalias en ils chantuns Grischun e Glaruna. Bun in terz da quests manaschis èn vegnids controllads.
Sco il manader da l'uffizi Giochen Bearth ha ditg envers RTR, èn ils resultats da l'aua da baiver or da funtaunas da vitgs e citads fitg positivs. Potenzial dettia dentant puncto qualitad tar l'aua per far la duscha u l'aua en bogns cuverts.
L'aua è schubra ed ha in'auta qualitad.
Buna sanadad d'animals
Er per la sanadad dals animals da niz han ils manaschis grischuns e glarunais tut en tut survegnì in bun attestat. Er mazlarias e 20% da la charn da selvaschina da la chatscha èn vegnidas examinadas. Las controllas n'eran per part betg annunziàdas.
