Controlladers da victualias han tranter il mars e november testà 461 bigls publics en il Grischun sin la qualitad da l'aua da baiver. Ils tests han els fatg sin contaminaziuns microbiologicas tras scherms, il gas radioactiv radon, il metal radioactiv uran u il metal grev arsen.
Tar 27 provas sajan las valurs maximalas lubidas vegnidas surpassadas. Quai ha ditg Matthias Beckmann, il manader da l'Uffizi per la segirezza da victualias e per la sanadad d'animals dal Grischun. Per part hajan els chattà gist pliras contaminaziuns. Sulettamain il metal radioactiv uran n'hajan ins betg pudì cumprovar.
Plinavant hajan ils controlladers intercurì bunamain 70 provas d’aua da bajetgs vegls ed istorics. En naginas da quellas provas n’hajan els pudì cumprovar restanzas da plum u d’arom.
