En il bajetg Neumühle a Cuira sa chatta l'atelier da restauraziun che tutga tar il Servetsch archeologic dal Grischun. Tut ils objects ch’èn archeologicamain relevants vegnan purtads là tar Johanna Wolfram Hilbe, che lavura dapi passa 10 onns sco restauratura per il chantun.
La lavur da Johanna Wolfram Hilbe dependa fermamain da l’object cun quel ch'ella lavura. Quai pon esser armas, bischutaria, vasas ed anc blers auters objects archeologics or da tuts differents materials.
Igl è sco da pachetar ora ina trucca da stgazis.
Savens lavura ella a maun cun in scalpel, deliberond cun gronda attenziun la surfatscha da terra e tschuf. Per objects pli gronds dovra ella magari era maschinas, sco per exempel in radiatur da sablun. Sco restauratura lavura ella principalmain en l'atelier e na sa participescha betg a las exchavaziuns archeologicas al lieu.
Per questa professiun è ella gia sa decidida sco giuvna, damai che questa lavur porschia la maschaida perfetga tranter artisanadi e scienza. Questa lavur dovra in sentiment fin e blera pazienza, per part lavura ella plirs dis vi dal medem object.
Uschespert che la surfatscha originala è scuvrida, vegn quest object tramess ad in expert ch'examinescha lura la vegliadetgna e la derivanza exacta. Suenter survegn Johanna Wolfram Hilbe puspè enavos l’object per conservar el en l'archiv ubain per dar vinavant quel ad in museum.
Or da l'archiv
