Emprima revisiun è sut tetg
La lescha da polizia è vegnida actualisada cun gronda approvaziun dal Cussegl grond – numnadamain cun 101 encunter 7 vusch. Questa lescha cuntegna da nov in management da smanatschas. Cun quest sistem duai la Polizia chantunala survegnir la pussaivladad d'identifitgar meglier ed impedir grevs acts da violenza intenziunads. En la pratica stattan ils cas da violenza a chasa en il center.
Atras l'introducziun da questas mesiras polizialas vegn il chantun Grischun a suandar la maioritad dals chantuns che han introducì mesiras polizialas correspundentas ils onns passads. Per il Grischun muntass quai, d’introducir plazza da totalmain 570% pensum. La lescha duai ir en vigur l’entschatta 2026.
Valérie Favre Accola surpiglia il tron dal Cussegl grond
Silvia Hofmann da la partida socialdemocratica va en pensiun en sia rolla sco presidenta dal Cussegl grond. Quai sco definì suenter in onn. Liber la plazza fa ella suenter ses pled d'avertura, per sia successura Valérie Favre Accola. La dunna da Tavau vegn a surpigliar lura directamain sco pli auta Grischuna. Il parlament ha elegì ella cun 108 da 109 vuschs valaivlas.
Ella fa part da la partida populara svizra ed è dapi l’onn 2018 deputada dal Cussegl grond. Dapi quest onn è ella vicepresidenta dal Kleiner Landrat, la suprastanza da Tavau. Sonda vegn lura fatg festa a Tavau per la nova presidenta. Sco vicepresident è vegnì elegì Fabio Luzio da la partida liberaldemocratica.
Revisiun parziala da la lescha da polizia
Cun questa revisiun duai vegnir stgaffì la basa legala per in management da smanatschas. Cun quest sistem duai la Polizia chantunala survegnir la pussaivladad d'identifitgar meglier ed impedir grevs acts da violenza intenziunads. En la pratica stattan ils cas da violenza a chasa en il center. Tras l'introducziun da questas mesiras per mauns da la polizia vegn il chantun Grischun a suandar a la maioritad dals chantuns. Quels han introducì talas mesiras ils onns passads. Per il Grischun munta quai ch'el ha d'augmentar il pensum da plazzas per 570 pertschient.
Revisiun da la lescha da taglia
Famiglias, pèrs cun duas pajas e persunas spezialisadas duain pajar pli pauc taglia. Quai è la finamira da l’incumbensa dal deputà Oliver Hohl (PLD) dal 2022. La revisiun parziala da la lescha da taglia è uss il segund pass per realisar questa incumbensa. Sco bain savens van las opiniuns en la politica dentant dapart. La cumissiun ch’ha preparà la fatschenta per il Cussegl grond è perina cun la proposta da la regenza – che famiglias dastgan trair giu dapli da la taglia per la tgira d’uffants. Ed er che pèrs cun duas pajas dastgan trair giu dapli da la taglia.
Discussiuns datti dentant puncto la proposta che famiglias duain dastgar trair giu dapli per ils singuls uffants. Ed er davart l’import liber da la taglia chantunala van las opiniuns dapart. La regenza propona d’augmentar quel da 15’500 francs sin 16’000. Ina part da la cumissiun vul salvar el tar 15’500, l’autra part augmentar el anc dapli sin 16’800 francs.
Chalender emplenì cun dumondas ed incumbensas
Sin il program da la sessiun d’avust stattan bleras dumondas ed incumbensas ch’il Cussegl grond ha da liquidar. Per exempel è sin maisa in’incumbensa da la fracziun da la PPS che pretenda, che la regulaziun dal luf daventa pli effizienta. Quai munta, che tut ils chatschaders e chatschadras cun ina patenta duessan tenor la PPS pudair sajettar lufs. Vitiers duessan las multas per schluppettadas sbagliadas vegnir reducidas sin in minimum.
En pli datti ina dumonda pertutgant la distribuziun da la posta. Tar la revisiun parziala che marscha actualmain sin livel federal èn pertutgadas las chasadas che n’èn betg abitadas durant l’entir onn - quellas na duain betg pli survegnir furnì la posta. Tras la revisiun da l'ordinaziun federala da la posta duessan en futur vegnir distribuidas 90 pertschient da las chartas, pachets e gasettas punctualmain. Oz è questa prescripziun tar las chartas tar 97 pertschient, e tar pachets e gasettas tar 95 pertschient. Il Cussegl grond dumonda en quest connex l’opiniun e l’agir da la regenza.
In’autra incumbensa tracta il process da permissiun da construcziun ed ils recurs ch'i dat savens. Reto Crameri dal Center pretenda perquai da la regenza, d’examinar sco far pli spert ils proceders da permissiun da construcziun tar recurs.