Regulaziun dal luf – dapli cun l’agid da chatschaders e chatschadras
Chatschadurs e chatschaduras duessan vegnir inclus pli fitg tar la regulaziun digl luf – quai pretenda il Cussegl grond ed ha surdà in'incumbensa a la regenza. Quai cun ina gronda maioritad da 106 cunter nov vuschs. Concret vul quai dir, che chatschaders e chatschadras che han ina patenta ed han prendì part a l’occurrenza d’instrucziun pon durant la chatscha auta e speziala gidar vinavant a regular trieps entirs da lufs. La regenza vul examinar sche ils chatschaders e chatschadras pudessan era sustegnair cun sajettar luffins.
L’incumbensa che vegn uriundamain da la Partida populara svizra è vegnida indeblida dal parlament. Per exempel ha la PPS vulì che multas vegnan reducidas sin il minimum sche in luf vegn sajettà per sbagl. Quai na va tenor la regenza betg, pervia la lescha federala.
En pli ha la PPS pretendì che la chatscha sin lufs vegn prolungada sch’il dumber vegn betg cuntanschì. I na saja tenor la regenza dentant betg il cas che la finamira vegn betg cuntanschida perquai che la guardiaselvaschina è surchargiada, mabain perquai ch'i saja grev da differenziar vers la fin da la fasa da regulaziun tranter luffins e lufs creschids.
Revisiun da la lescha da taglia
Cun la revisiun da la lescha da taglia vegnan cunzunt famiglias distgargiadas. La finamira è ch'il chantun daventa pli attractiv per abitar. Cun 85 cunter 29 vuschs ed ina abstenziun ha il parlament chantunal ditg cleramain Gea a la revisiun.
Famiglias pon en l'avegnir trair giu dapli daners per ils uffants ed er dapli per la tgira d'uffants externa. Er per persunas maridadas datti levgiaments da taglia. Las opiniuns èn stadas cleras – ils burgais eran per gronda part perina che la revisiun sco quai ch'ella è sin maisa fa senn – ed ils socialdemocrats han cunzunt crititgà che mo famiglias bainstantas profiteschan dals levgiaments. Critica hai denton era dà davart da vischnancas e plaivs – è represchentantas e represchentants da quellas sesan en il Cussegl grond. Era els èn pertutgads da la revisiun perquai ch'els prendan en pli paucs daners da taglia.
Grischun survegn in management da smanatschas
La lescha da polizia è vegnida actualisada cun gronda maioritad dal Cussegl grond, numnadamain cun 101 encunter set vuschs. Questa lescha cuntegna da nov in management da smanatschas. Cun quest sistem duai la Polizia chantunala survegnir la pussaivladad d'identifitgar meglier ed impedir grevs acts da violenza intenziunads. En la pratica stattan ils cas da violenza a chasa en il center.
Tras l'introducziun da questas mesiras polizialas vegn il chantun Grischun a suandar la maioritad dals chantuns che han introducì mesiras polizialas correspundentas ils onns passads. Per il Grischun munta quai ch'el ha d'augmentar il pensum da plazzas per 570 pertschient. La lescha duai ir en vigur l’entschatta 2026.
Valérie Favre Accola surpiglia il tron dal Cussegl grond
Silvia Hofmann da la partida socialdemocratica va en pensiun en sia rolla sco presidenta dal Cussegl grond. Quai sco definì suenter in onn. Liber la plazza fa ella suenter ses pled d'avertura, per sia successura Valérie Favre Accola. La dunna da Tavau vegn a surpigliar directamain sco pli auta Grischuna. Il parlament ha elegì ella cun 108 da 109 vuschs valaivlas.
Ella fa part da la Partida populara svizra ed è dapi l’onn 2018 deputada dal Cussegl grond. Dapi quest onn è ella vicepresidenta dal Kleiner Landrat, la suprastanza da Tavau. Sonda vegn lura fatg festa a Tavau per la nova presidenta. Sco vicepresident è vegnì elegì Fabio Luzio da la partida liberaldemocratica.
Chalender emplenì cun dumondas ed incumbensas
Sin il program da la sessiun d’avust stattan bleras dumondas ed incumbensas ch’il Cussegl grond ha da liquidar. Per exempel è sin maisa in’incumbensa da la fracziun da la PPS che pretenda, che la regulaziun dal luf daventa pli effizienta. Quai munta, che tut ils chatschaders e chatschadras cun ina patenta duessan tenor la PPS pudair sajettar lufs. Vitiers duessan las multas per schluppettadas sbagliadas vegnir reducidas sin in minimum.
En pli datti ina dumonda pertutgant la distribuziun da la posta. Tar la revisiun parziala che marscha actualmain sin livel federal èn pertutgadas las chasadas che n’èn betg abitadas durant l’entir onn - quellas na duain betg pli survegnir furnì la posta. Tras la revisiun da l'ordinaziun federala da la posta duessan en futur vegnir distribuidas 90 pertschient da las chartas, pachets e gasettas punctualmain. Oz è questa prescripziun tar las chartas tar 97 pertschient, e tar pachets e gasettas tar 95 pertschient. Il Cussegl grond dumonda en quest connex l’opiniun e l’agir da la regenza.
In’autra incumbensa tracta il process da permissiun da construcziun ed ils recurs ch'i dat savens. Reto Crameri dal Center pretenda perquai da la regenza, d’examinar sco far pli spert ils proceders da permissiun da construcziun tar recurs.