Themen in diesem Newsticker
- La debatta cuntinuescha damaun...
- Lescha da polizia è revidida
- Sessiun d'october è averta
Sustegn per persunas che tgiran lur confamigliars
En il rom dal plan d’acziun da l'Uffizi da sanadad dal Grischun duai dar sustegn per persunas che tgiran lur confamigliars. Previsa è ina contribuziun mensila da 300 enfin 600 francs. Questa revisiun parziala da la lescha da tgira duai ir en vigur pli probabel il cumenzament 2027.
Tenor il messadi da la regenza è quai in tema che vegn survesì en l'entira Svizra. Tenor stimaziuns surpiglian enturn 600'000 persunas en Svizra mintga di la responsabladad per lur geniturs attempads, partenaris e partenarias malsaunas u confamigliars cun impediment – quai per gronda part senza avair ina scolaziun e senza sustegn u indemnisaziun finanziala.
Il chantun Grischun quinta cun custs annuals da 2,4 milliuns francs. En il Cussegl grond pudess questa revisiun dar ina discussiun da princip, schebain il maun public duai reparter raps. Il tema è gia pli ditg sin maisa. Il 2015 aveva Marcus Caduff, da lez temp deputà, pretendì mesiras per sustegnair confamigliars.
Lescha da polizia 2.0
Gia l’avust ha il Cussegl grond revedì ina part da la lescha da polizia, quai tranter auter cun precisar mesiras tar smanatschas. Ussa suonda la segunda part, nua ch'i duai vegnir reglà per tge che la polizia dastga duvrar maletgs da cameras automatisadas che controlleschan vehichels. Questa tematica ha chaschunà bleras reacziuns durant la consultaziun, ch'èn vegnidas resguardadas cun far la revisiun – uschia ch’i n’ha en la cumissiun predeliberanta betg pli dà grondas discussiuns.
Per delicts pitschens u bagatellas na dastga la polizia betg duvrar cameras che controlleschan vehichels a moda automatisada. Il Tribunal federal ha enumerà il 2022 tge premissas che valan per surveglianzas automatisadas sin vias. La lescha da polizia grischuna enconuscha dapi il 2018 in artitgel per la «tschertga automatisada da vehichels». Quel è dentant memia diffus e na satisfa betg a las premissas da Losanna. Perquai duai ussa vegnir enumerà a moda clera cura che la Polizia chantunala dastga insumma duvrar maletgs da talas cameras (detagls en la boxa).
Sper quai vegn era prescrit en la lescha tgi ch’ha invista en las datas e quant svelt che quellas ston puspè vegnir stizzadas. En pli duai vegnir reglà la protecziun d’uffants e giuvenils tar investigaziuns e detagls da surveglianzas secretas.
La Regenza ha aposta dividì en duas parts la revisiun: Per l’ina per mantegnair l’unitad da la materia e per l’autra per betg periclitar entras in referendum gist tuttas disposiziuns che ston vegnir adattadas en la lescha da polizia.
Credit supplementar per infrastructuras relevantas per il sistem
Avant diesch onns ha il Cussegl grond decidì da dar in credit da 80 milliuns francs per l'infrastructura relevanta en il chantun. Pli tard ha il Cussegl grond decidì da reservar 35 da quests 80 milliuns per ils projects da l’access da l’internet cun extender il bindel ultra lad.
Dal 2017 enfin il 2024 ha la regenza concedì daners per 26 projects che vegnan u èn vegnids sustegnids. Tranter auter il bogn cuvert ed albiert da giuventetgna a Laax, in ulteriur edifizi sin il campus medicinal a Tavau u l’arena da biatlon a Lai.
Ils raps, ch’èn reservads per l’internet, mancan en quest credit per l’infrastructura ed uschia ha il Cussegl grond decidì il favrer 2025 d’augmentar il credit per ulteriurs 35 milliuns francs. Questa sessiun vai per la dumonda sch’il Cussegl grond vul conceder quest credit u betg.
Cun il credit supplementar duain vegnir sustegnids projects sco per exempel la construcziun da l’infrastructura da far naiv a Mustér, Tschierv e Scuol, projects d'Origen e la nova halla per eveniments a Cuira. Quests ulteriurs 35 milliuns francs vegnissan finanziads or da las entradas disponiblas dal chantun. Quest credit fiss limità enfin l’onn 2030, vul dir che la regenza sto conceder ils projects enfin lura.