La sessiun da zercladur è ida a fin. Silvia Hofmann ha discurrì d’ina sessiun intensiva. Pliras leschas èn vegnidas revedidas, da l'iniziativa per fermar las rentas a vita duranta per la regenza è vegnì discutà ed igl è vegnì decidì ina revisiun totala da la lescha davart la promoziun dal spazi d’abitar. En pli èn numerusas dumondas vegnidas respundidas ed intginas incumbensas surdadas. La proxima sessiun dal Cussegl grond ha lieu la fin d'avust.
Chantun duai sustegnair ospitals regiunals
Il chantun Grischun duai sustegnair pli fitg ospitals regiunals. Quai pretenda il Cussegl grond ed ha surdà cun 97 vuschs Gea unanimamain ina incumbensa a la regenza.
Adina puspè han vischnancas da sustegnair ospitals regiunals finanzialmain. Uss duai il chantun dar contribuziuns à fonds perdu per projects ed investiziuns. L'incumbensa pretenda plinavant che la regenza examinescha la creaziun dad in fonds per finanziar projects ed investiziuns da las organisaziuns da sanadad. La regenza saja gia vi da surlavurar la planisaziun directiva da l'organisaziun dal provediment da sanadad – ed integrescha questas novas pretensiuns ch'il Cussegl grond ha fatg.
Purschida per persunas dependentas
Per persunas ch’èn dependentas da drogas è ina abitaziun insatge che dat segirezza e stabilitad. Dapi il 2024 fa l’uniun Oase il project «housing first» nua che persunas dependentas survegnan in'abitaziun e cussegliaziun. Actualmain èn quai sis persunas.
Tenor Patrik Degiacomi, deputà dal Cussegl grond e suprastant da la citad da Cuira, che ha infurmaziuns da la scena da drogas a Cuira, crescha il dumber da persunas che n'han nagina abitaziun. Dal 2022 eran quai 10 persunas – dus onns e mez suenter è questa cifra sa triplada sin 33 persunas. Propi duvrà la purschida da «housing first» han il cumenzament 2025 dentant mo sis persunas. Tenor la regenza na saja betg mintga persuna adattada per il project. Da questas 33 persunas senza abitaziun vegnissan sulettamain en dumonda 10 persunas. Mintgatant na vegnia agid era betg acceptà.
Patrik Degiacomi vul extender la purschida per persunas che vegnan or da la praschun. Tenor el vegnan quellas relaschadas cun raps ch’els han gudagnà en la praschun e ch’els dovran per gronda part directamain per drogas. En pli n'han ellas nagina abitaziun. La citad vul porscher l’abitaziun ed il chantun duai tgirar questas persunas cun purschidas da differents uffizis. Sch'il project «housing first» vegn cuntinuà suenter il 2025 e sch’el vegn extendì vul la regenza examinar.
Cussegl grond approva lescha da promoziun da spazi d'abitar
Il Cussegl grond ha approvà la nova lescha per la promoziun da spazi d'abitar. Per ils proxims 10 onns vegn il chantun uschia ad investir tranter 40 e 50 milliuns francs per cumbatter la mancanza da spazi d'abitar.
La lescha vul tranter auter dar emprests favuraivlas a cooperativas d'abitar. E precis là hai dà discussiuns. La regenza vuleva dar ulteriuras contribuziuns à fonds perdu da 2%. La Partida socialdemocratica ha vulì redublar quellas. La fin da la discussiun è quest artitgel vegnì stritga dal tut – ed uschia è la lescha vegnida schluccada da la vart burgaisa.
Jau na sun insumma betg cuntenta cun il resultat da la debatta. La fin finala n'era il temp betg da valur da discutar da questa lescha ch'è la fin finala senza effect. Uss avain nus ina lescha cun in bel titel, tar las consequenzas n'è questa lescha dentant nagut.
Ultra da quai duessan chasadas cun entradas da fin 60'000 francs dumandar subvenziuns per cumprar, bajegiar u renovar immobiglias. La sanestra vuleva anc ir pli lunsch e stgaffir in fond da promoziun da 100 milliuns francs.
Martin Bühler daventa l'auter onn president da la regenza
Cun 111 da 114 vuschs ha il Cussegl grond elegì Martin Bühler sco president da la regenza grischuna per l’onn 2026. Quai è l’emprima giada ch’el surpiglia quest post. Il politicher da la Partida liberaldemocratica succeda uschia a Marcus Caduff ch’è anc fin la fin da l’onn president.
Carmelia Maissen da la Partida il Center surpiglia il post da la vicepresidenta da la regenza. Ella è vegnida elegida cun 105 da 115 vuschs. Omadus èn dapi l’onn 2023 en la regenza grischuna.
Cussegl grond vul reducir e betg stritgar la renta da la regenza
Il pievel duai decider a l’urna sche la regenza survegn ina renta da maximalmain trais onns u sche la renta vegn abolida. Pia va la cunterproposta da la regenza ch’è vegnida acceptada dal Cussegl e l’iniziativa da la Partida populara Svizra davant il pievel. Piglian or, sche il PPS retira sia iniziativa.
Actualmain èsi numnadamain uschia, che commembers e commembras da la regenza Grischuna survegnan ina renta per vita duranta, suenter ch’els sortan da la regenza.
Tar la renta quintan era prestaziuns d’invaliditad e la renta da relaschads. Pli ditg che insatgi era en la regenza, pli auta è la renta, enturn 115’000 francs. Tenor la PPS na saja quai betg necessari.
Encunter questa iniziativa ha la regenza fatg ina cunterproposta. Quella vul era, che la renta a vita duranta vegn abolida. Dentant duai la regenza survegnir per maximalmain trais onns suenter sortir da la regenza u enfin la vegliadetgna da pensiun ina renta. Uschia na dettia nagin conflict d’interess sche commembers e commembras han da tschertgar ina nova lavur. Il Cussegl ha deliberà questa cunterproposta cun 91 cunter 24 vuschs.
Cussegl grond approva quint annual 2024
Il Cussegl grond ha approvà la mesemna il quint annual dal 2024. E quai unanimamain, suenter ch'igl ha dà discussiuns en il parlament, nua ch’il chantun pudess investir dapli.
Il quint annual da l’onn passà è vegnì serrà cun in surpli da 84 milliuns francs. Quai suenter ch'il chantun Grischun aveva budgetà in deficit da bunamain 50 milliuns francs. Sco quai ch'il chantun ha ditg gia il mars, sa basia il resultat positiv surtut sin dapli entradas da taglia. Era las dividendas pli autas da la Banca chantunala e tschains d'aua hajan contribuì ina part.
Avertura da la sessiun
Mardi suentermezdi ha cumenzà la sessiun da zercladur dal Cussegl grond dal Grischun. Silvia Hofmann, la presidenta dal Cussegl grond, ha avert la sessiun e fatg endament a l’entschatta da la democrazia e sias valurs. La presidenta è da l’avis, ch’ins duai per part esser pli quiet, pli modest ed engraziaivel. En pli ha Silvia Hofmann tratg endament la populaziun dal Lötschental a ses collegas deputadas e deputads ed ha tramess forza. La sessiun dal zercladur cuzza fin venderdi.
Ulteriurs temas durant la sessiun
Sper ils dus gronds temas stattan anc bleras autras revisiuns, dumondas ed incumbensas sin il plan da lavur. Tranter auter vegn Martin Bühler elegì sco president da la regenza per l’onn 2026. Ina dumonda tracta la situaziun da viver da persunas dependentas. Plinavant vegn sclerì la dumonda co e enfin cura ch’il chantun Grischun sustegna il project «housing first». Alura èn las vias grischunas tema, surtut las zonas da tempo 30. Questas na duessan tenor la PPS betg pli vegnir introducidas enfin che quai vegn anc discutà sin livel naziunal. In’autra dumonda a la regenza vul, che las posiziuns dals radars vegnan publitgads.