La sessiun dal zercladur ha cumenzà cun il pled dal president dal Cussegl grond, Martin Wieland, il pli aut Grischun. El ha cità Charlie Chaplin:
Senza umanitad e senza amur per il proxim n'è nossa vita betg degna da vegnir vivida.
En ses pled ha Martin Wieland fatg attent che blera glieud haja il sentiment che la politica haja gronda u memia gronda pussanza - perquai saja impurtont che deputadas e deputads mussan che pussanza ed umanitad n'èn betg qualitads incumpatiblas.
Rapport da la PUK stat en il center
Il mardi da la sessiun dal zercladur è reservà per il rapport da la PUK. Deputadas e deputads dal Cussegl grond ston numnadamain prender per enconuschientscha il rapport che la cumissiun ha preschentà l'emna passada. Sper quai duai il parlament er constatar che las inquisiziuns da la PUK èn a la fin e ch'ella duai vegnir schliada suenter che las lavurs administrativas èn terminadas.
Igl è dentant en scadin cas er anc da quintar cun dumondas, reacziuns e discussiuns. Ed igl è er pussaivel ch'i vegnan anc pretensiuns ord las retschas dal parlament, sco per exempel mesiras per evitar cartels en il futur.
Il quint, elecziuns, dumondas ed incumbensas
Sper il rapport da la PUK spetga anc il quint 2020 ch'il parlament sto approvar. Quel ha malgrà la pandemia da corona serrà cun in plus dad 80 milliuns francs. Vitiers vegn er anc l'elecziun dal president da la regenza, tenor turnus suonda Marcus Caduff a Mario Cavigelli, omadus da l'Allianza dal Center.
La sessiun da zercladur cuzza 3 dis, dals 14 enfin ils 16 da zercladur.
