Siglir tar il cuntegn

Header

cuntegn

Situaziun da gas en Grischun Ston chasadas cun stgaudaments da gas schelar l'enviern?

Quant dependent è il Grischun dal gas? E pudess la mancanza da gas daventar in problem durant l'enviern? Thomas Schmid da l'Uffizi chantunal d'energia e traffic dat ina survista da la situaziun en il Grischun e declera, tge mesiras ch'i duvrass en cas d'ina tala mancanza.

audio
Mancanza da gas: Situaziun en il Grischun
ord Actualitad dals 26.07.2022.
laschar ir. Durada: 3 minutas.

Quant gas vegn duvrà en Grischun? Mintga di duvrain nus energia en furma d'electricitad, materials fossils dad arder e carburants. Per be 4% da l'entira dumonda d'energia en il Grischun vegni duvrà gas, di Thomas Schmid, il manader da l'Uffizi d'energia e traffic. Sco che questa grafica mussa èn auters chantuns, surtut aglomeraziuns da citads en la Svizra dal vest pli dependentas dal gas ch'il Grischun.

IBC distribuescha il gas en Grischun

Avrir la box Serrar la box

L'IBC (Industrielle Betriebe Chur) è responsabla per la distribuziun dal gas. En il chantun Grischun datti sulet en la Val dal Rain fin a Tusaun ina rait da lingias da gas. L'IBC procura ch'il gas arrivia en las chasadas e tar las firmas che dovran gas. La repartiziun è circa 50% privats e 50% firmas. Il mainagestiun Martin Derungs quinta tar ina mancanza da gas cun 20% fin 30% pli pauc. Per eventuals appells da spargnar u schizunt ina contingentaziun fiss lura dentant la Confederaziun responsabla. In appel general da spargnar vegnia l'IBC probablamain dentant a far vers l'atun.

audio
Gas en Grischun: Distribuziun e mancanza pussaivla
ord Actualitad dals 02.08.2022.
laschar ir. Durada: 3 minutas 26 Secundas.

Per tge vegn il gas duvrà? En Svizra vegn il gas surtut duvrà per stgaudaments da chasas. Per producir electricitad na vegn il gas betg duvrà. Las regiuns dal Grischun che stgaudan per part cun gas èn la Val dal Rain da Cuira, ina part dal Plaun (Imboden) e dal Signuradi.

Intginas firmas dovrian anc gas per tscherts process, quai dentant lura savens a moda mobila cun implants da tancs. La tendenza generala saja plitost da vulair remplazzar stgaudaments fossils (ieli e gas).

Producescha la Svizra sezza gas? La Svizra producescha strusch agen gas. Quai è ina gronda differenza cumpareglià cun ils pajais vischinants. Quasi tut il gas ch'è relevant per la Svizra è pia gas natiral (Erdgas) che vegn importà. Il sistem funcziuna pia tras ina furniziun constanta, uschia Thomas Schmid da l'Uffizi chantunal d'energia e traffic.

Ha la Svizra avunda gas per l'enviern? La Svizra emprovia ussa da survegnir garanzias per il proxim enviern. Ella vul avair access a las furniziuns ed als magasins da gas, quai surtut da la Germania, da la Frantscha, da l'Ollanda e da l'Austria. Tenor Thomas Schmid saja quai però grev en ina situaziun da crisa. Uschia saja la situaziun pertutgant il gas detg malsegira. Tge che saja dentant in avantatg per la Svizra è ch'ella na producescha nagina electricitad da gas.

audio
Mancanza da gas: Dependenza e consequenzas
ord Actualitad dals 26.07.2022.
laschar ir. Durada: 4 minutas 19 Secundas.

Co reagir en cas d'ina mancanza da gas? Tut ils pajais stoppian guardar per alternativas pertutgant gas. La Russia vegnia franc a tegnair l'Europa sut pressiun pertutgant il commerzi da gas, di Thomas Schmid. Era sch'il gas gioghia ina rolla pli pitschna en Svizra ch'en ils pajais vischinants stoppia ella sa preparar.

Mesiras en cas d'ina mancanza

Avrir la box Serrar la box
  1. Appel da spargnar
  2. Midar implants che funcziunan cun duas materias (ieli e gas) sin ieli
  3. Restricziuns (p.ex. sbassar la temperatura da stgaudament en bajetgs publics)
  4. Contingentaziuns

La Confederaziun e l'Uffizi per il provediment economic dal pajais executeschan las mesiras e l'industria da gas realisescha lura ellas. Nua ch'i saja pussaivel da remplazzar il gas saja l'ieli la suletta alternativa.

A lunga vista èsi impurtant da promover energias regenerablas. Il proxim enviern è però gia qua en quatter mais.
Autur: Thomas Schmid manader da l'Uffizi d'energia e traffic

Avessan ins pudì evitar ina dependenza da gas da l'exteriur? D'impedir la situaziun actuala cumplettamain fiss stà grev. Tuttina sa mussia uss che l'Europa saja sa fatga dependenta da la Russia. Ils custs d'energia vegnian en mintga cas a s'augmentar. Tenor Thomas Schmid na vegnia quai però betg ad esser in problem finanzial per la gronda part dals consuments e da las consumentas.

In purtret da Thomas Schmid.
Legenda: Thomas Schmid da l'Uffizi per energia e traffic. mad

Tge è impurtant per il futur tenor l'expert? Impurtant saja tenor Thomas Schmid che la societad midia en general sia conscienza pertutgant l'energia. Il consum d'electricitad creschia, nus dovrian pia dapli electricitad. En general stoppia la populaziun savair ch'i dettia ina probabladad d'ina mancanza da gas, ma ch'i dettia era in plan, co vegnir a frida cun quella.

RTR actualitad 07:00

Artitgels legids il pli savens

Scrollar a sanestra Scrollar a dretga