L’emprima crisa d’energia globala saja uss realitad, e cunzunt pertutgada saja l’Europa. Quai ha ditg il directur da l’Uffizi federal d’energia Benoît Revaz avant las medias a Berna. Perquai lavuria la Confederaziun dapi mais ensemen cun la branscha d’energia vi da soluziuns per segirar il provediment per l’enviern che vegn. Fin la fin d'avust duai esser pronta ina plattafurma communabla per infurmar e dar tips.
Gia uss spargnar
Il ristg d’ina situaziun cun memia pauc energia saja reala e gronda. Perquai stoppian tuts e tuttas sa dar bregia da duvrar a curta vista damain electricitad. Quai ha manegià il directur da la Federaziun da l’Uniun da las ovras electricas svizras. Contribuir possian ins cun duvrar damain aua chauda, e davent da l’atun cun stgaudar pli pauc.
Situaziun actuala da l’energia
Ils lais artifizials en Svizra che servan a la producziun d’electricitad èn emplenids sco normal da quest temp. E las ovras atomaras produceschian tut quai che saja pussaivel, ha ditg il manader da fatschenta da la cumissiun per l’electricitad Elcom. Sulet l’ovra da Beznau lavuria en modus reducì pervi da la chalira.
UE quinta cun stop da gas russ
Per la presidenta da la cumissiun da l’UE Ursula von der Leyen èsi probabel, che la Russia interrumpa dal tut la furniziun da gas en l’Uniun europeica. Quai ha la politicra tudestga ditg a Brüssel. Gia en il passà hajan ins vis, che la Russia emprovia da far squitsch sin l’UE cun reducir il provediment da gas.
Perquai ha la cumissiun da l’UE in plan d’urgenza per l’enviern che vegn, sch’il gas russ chala da vegnir. Mintga pajais da l’UE duai brischar fin la primavaira che vegn 15% damain gas. Vegnia tuttina tar stretgas, surdattan ils pajais da l’UE a la cumissiun il dretg da cumandar mesiras da spargn.
