Aifer diesch onns han scienziads e scienziadas sviluppà ina charta pli detagliada dal privel da lavinas. Enfin ussa datti talas chartas da privels en blers lieus be per territoris abitads. Sviluppà la charta ha l'Institut da naiv e lavinas a Tavau.
Las novas chartas furneschan ussa infurmaziuns per exempel per chamonas e territoris da skis. Ed ellas dattan era ina survista davart ils privels da lavinas per lingias da viafier e vias. L’emprima charta da quest tip han ils perscrutaders da l’SLF sviluppà per il chantun Grischun. Per far la charta hani duvrà simulaziuns: En tut hani simulà var 2 milliuns lavinas.
Els han er pudì giuditgar la rolla dal guaud da protecziun: Senza guaud fiss 84% da la surfatscha dal chantun periclità da lavinas, cun il guaud èsi mo dus terzs. E l'interess vi da la software per far la charta saja grond: I haja gia dà dumondas da tut il mund.
