En ils auals svizzers èsi monoton, quai che reguarda peschs. Quai chatta in studi da l'Eawag, l'institut da perscrutaziun d'aua da l'ETH. Ils resultats dal studi èn uss publitgads.
Durant tschintg onns han collavuraturs e collavuraturas examinà en l'entira Svizra flums ed auals. En tut han ins dumbrà passa 20'000 peschs da 50 spezias. Remartgabel: be en 16 da 324 auals han perscrutadras e perscrutaders chattà dapli che 10 spezias.
La situaziun en il Grischun
En la gronda part dal Grischun na datti quasi nagina diversitad da spezias pli. En ils 69 lieus intercurids datti anc in ch'ha dapli che trais spezias, numnadamain il Rain a Mastrils.
En ils blers auters auals chatt'ins mo litgivas. Frillas (Elritze per tudestg) e rambots (Groppe) datti anc en intgins auters lieus (vesair charta):
Cas spezial da l'Engiadina
Er en ils auals da l'Engiadina na chatta il studi quasi nagut auter che litgivas. Là dentant èn almain las litgivas diversas, er sch'ellas han tenor analisas da DNA cumenzà a sa maschadar. Almain per part sajan ils differents tips da litgivas er vegnids en l'Engiadina tras repopulaziun, e na sajan betg tips indigens.
En il Grischun ed en l'entira Svizra è la diversitad da spezias ferm sut squitsch. 74% da las spezias indigenas da peschs e giombers valan sco mortas ora, u periclitads da l'extincziun. La diversitad da spezias ha dentant ina impurtanta funcziun: ella fa ch'ina spezia sco tala po reagir meglier sin midadas da l'ambient.
Or da l'archiv (in auter project):
