In trenader da skis talian, che ha lavurà onns a la lunga per l’Uniun grischuna da skis, è vegnì sentenzià e bloccà per tschintg onns. La Dretgira da sport svizra ha declerà l’um da 52 onns culpant d’avair maltractà junioras da 16 fin 18 onns, tant psichicamain sco era fisicamain – per exempel cun tutgar en las atletas nuncommensuradamain, cun observar ellas sut la duscha, ma era cun far remartgas malnettas e sbragir, smanatschar ed umiliar ellas.
Tenor la documentaziun da la Dretgira da sport svizra ha il post «Swiss Sport Integrity» (SSI) survegnì il zercladur 2023 pliras annunzias dad atletas. Il SSI ha lura dumandà pliras atletas e contactà l'uniun da skis. Era ha il SSI questiunà l'inculpà ch'ha dementà las reproschas u che quai na saja betg stà uschè nausch sco interpretà da las atletas. En l'uniun da skis hai dà discurs ed ina persuna da sustegn ha procurà ch'il trenader na saja betg pli persul cun las atletas. Il trenader è en l'andament da l'onn lura s'annunzià malsaun pervi da problems psichics chaschunads da las reproschas. A la procedura è el stà absent nunperstgisà.
Sentenzia e consequenzas
La sentenzia da la Dretgira da sport svizra declera il trenader culpant d'avair cuntrafatg als statuts etics dal sport svizzer. Ella decretescha in scumond da trenar atletas ed atlets da tut las categorias da giuventetgna e juniors. En pli sto il trenader far part d’almain 25 uras da coaching à 45 minutas davart temas da violenza psichica, sexuala ed etica en contact cun minorenas. Ils custs da dretgira
La posiziun dal president da l’Uniun grischuna da skis da 2013-2025
La sentenzia è gia vegnida dada avant insaquants mais. L’anteriur president da l’Uniun grischuna da skis, Gaudenz Bavier ha confermà ad RTR il cas ed ha deplorà il fatg.
Gaudenz Bavier ha declerà ch'il trenader era vegnì engaschà il 2019 pervia da bunas referenzas. Suenter in onn han intginas atletas demissiunà, quai che ha chaschunà ina retschertga interna. Quella ha mussà ch'i deva problems. Bavier di ch'i haja dà discurs cun trenaders, atletas e geniturs. Il trenader inculpà ha survegnì sustegn psicologic. I saja er vegnì decidì che trenaders dastgian mo pli trenar cun las atletas sch’el vegni accumpagnà d’in auter trenader.
La Swiss Sport Integrity (SSI) ha intercurì ils fatgs ed ha discurrì cun diversas persunas involvidas. Tenor Bavier n'haja l'uniun betg simplamain pudì suspender il trenader perquai ch'el aveva in contract. I saja stà necessari d'emprim examinar ils fatgs.
Bavier manegia che las acziuns dal trenader na sajan betg capitadas cun intent nuschaivel. El conceda dentant ch'i valia la toleranza nulla en quests cas. Guardond enavos, di Bavier ch'el avess forsa stuì esser pli preschent tar las atletas.
Il trenader pertutgà n'ha betg vulì prender posiziun.
