Persunas creschidas cun intenziuns abusivas tschertgan savens contact cun uffants e giuvenils sur l'internet. Il pli va quai sur plattafurmas usitadas sco Snapchat ed Instagram. Ma i capita er sur plattafurmas da gaming, sin las qualas ils giugaders pon communitgar in cun l'auter.
Mintgin possia daventar unfrenda da mulesta sexuala en l'internet, dentant dettia intgins facturs che augmentan il privel.
Uffants senza gronda rait sociala e malsegirtad cun crear relaziuns pon esser pertutgadas pli savens.
Las furmas da mulestas sexualas en l'internet pon esser differentas. I dat creschids che tramettan ad uffants e giuvenils maletgs explicits. Auters emprovan da vegnir en possess da fotografias explicitas dals giuvenils, per als metter sut pressiun cun quel material. En la rait pon delinquents stabilir ina relaziun cun lur victimas potenzialas ed empruvar d'organisar scuntradas en la vita reala.
Las consequenzas per las victimas pon esser gravantas. I pon resultar stress, difficultads da sa concentrar, retratga u agressiuns.
L'emprim pass per las persunas pertutgadas saja da sa confidar als geniturs u ad ina persuna da referiment. I saja da grond'importanza che quellas persunas reageschan lura cun encletga e ruassaivladad.
Las victimas na duessen en nagin cas vegnir sentenziadas u denunziadas.
Uffants e giuvenils pertutgads pon er sa drizzar al servetsch psicologic u social da la scola. Plinavant datti il numer d'urgenza 147 da la ProJuventute, ch'è anonim e cuntanschibel 24 uras a di. En in proxim pass duai sche necessari vegnir fatg diever d'agid psicologic. Sut circumstanzas duai er vegnir infurmada la polizia, quai oravant tut sch'i sa tracta d'extorsiun u constricziun. En in cas da dubi duain ins adina dumandar la polizia per survegnir ina valitaziun professiunala da la situaziun.
Per prevegnir a mulestas sexualas en l'internet ha il 4. parlament da mattas convocà in inscunter tranter las suprastanzas da scola e differentas persunas spezialisadas – quai per chattar ina via cuminaivla per infurmar uffants e giuvenils davart la tematica.
Per quest intent han ins quest onn gia creà in placat ch'ins ha tramess a tut las scolas. Uschia duai surtut vegnir mussà nua che scolaras e scolars pon retschaiver agid en in cas da mulestas sexualas en l'internet. Ultra da quai vegnan en in ulteriur pass sensibilisadas las direcziuns da la scola, per ch'ellas possian sclerir meglier las scolaras ed ils scolars davart la tematica.