Il diever da l'implant militar a Sankt Luzisteig, damanaivel da Fläsch, per persunas che tschertgan asil è terminà. L'entschatta dal mais haja Armasuisse puspè surpiglià l'implant, scrivan las gasettas da Somedia, sin basa d'infurmaziuns dal Secretariat da stadi per la migraziun. Dal favrer fin mez matg ha l'implant dà suttetg a requirents d'asil cunzunt da l'Afganistan, da la Tirchia e dal Burundi.
Cuntents cun l'alloschi
Problems u incaps n'haja betg dà durant quest temp, ha inditgà il secretariat da stadi.
Ils requirents d'asil sajan stads cuntents cun l'implant, el saja modern, vast e generus, er il shuttle regular tranter l'implant e la staziun da Maiavilla saja vegnì stimà, uschia il pledader dal secretari da stadi.
