Las ivas sin las vignas han gugent el – il fain sin il prà dentant betg: Il sulegl. Da fertant che las temperaturas chaudas fan ch'il fain setga memia spert, pon las ivas madirar. En general pon ins dir che la racolta da fritgs e legums è buna quest onn, di Batist Spinatsch, il manader da la cussegliaziun agricula tar il Plantahof.
Il fain ha patì
Ins po dir: Dapli sulegl ch'il prà ha survegnì e pli mala che la racolta è stada. Sin prads sumbrivauns han puras e purs percunter fatg bler fain. Uschia saja la racolta fitg differenta da regiun tar regiun – schizunt da lieu tar lieu, di Batist Spinatsch.
En il Grischun Central ed en Surselva saja l'emprim tagl stà bun. En l'Engiadina saja stà different tut tenor lieu. En general pon ins dentant dir che l'emprim tagl saja – cumpareglià cun il segund ed il terz – stà bler meglier. Cunzunt il rasdiv – pia il segund tagl – saja stà bler mender ch'ils davos onns. I saja simplamain stà memia chaud: Il fain saja vegnì memia spert madir ed ins saja 10 dis ordavant, di il manader da la cussegliaziun agricula.
Tut en ina giada
Per fritgs e verdura saja il 2022 in bun onn. Schegea ch'ins haja gì da suar in zic per la racolta da verdura pervia da las autas temperaturas sajan ins cuntent. Er la racolta da fritgs è cuntentaivla. Tar las tschareschas possian ins schizunt bunamain discurrer dad in onn da record, di Batist Spinatsch. Dentant dettia tuttina inquala sfida pervia da las temperaturas autas; ils fritgs vegnan madirs bunamain tuts en ina giada. Vul dir che las periodas da racolta sa concentreschan cun las temperaturas autas che nus avain il mument.
Ina sfida da la midada dal clima pudess esser che las periodas da racolta sa concentreschan e vegnan pli curtas.
Las ivas han gugent chaud
Ils gronds profitaders da las chaliras èn las vignas. Da prognostitgar la racolta da quest onn saja grev, per il mument guardian ins dentant optimistic vers la vendemia da quest onn, di Walter Fromm, il cumissari da viticultura dal Grischun. Quai possia sa midar immediatamain cun capriolas da l'aura, er sch'ins na quintia per il mument betg cun talas. Ina consequenza da las temperauras autas saja che las ivas alvas e blauas vegnian ad esser madiras baud quest onn. Pervia da la racolta ad uras stoppian ils viticulturs er sa preparar pli baud ch'usità per la racolta cun far pront ils tschalers. Er gidanters e gidantras stoppian vegnir pli baud che normalmain. Spezial l'onn 2022 saja ch'ins stoppia quintar cun ina racolta da vin alv e vin cotschen cun in culp suenter l'auter. Normalmain datti ina pausa tranter las duas sorts.
Or da l'archiv
Racolta da fain, fritgs ed ivas a la veglia:
