Quai che resta da la stad d'alp 2025 èn las grondas midadas da l'aura – las fasas chaudas, bletschas e sitgas. Il zercladur haja cumenzà sitg e chaud, declera la cussegliadra d'economia d'alp Svenja Simmen. Quai saja stà ina sfida per signuns e signunas.
L'emprima gronda midada haja quai lura dà il fanadur, cura ch'igl é tuttenina vegnì fitg bletsch e fraid, di Svenja Simmen. Pervia da la blera plievgia e las temperaturas bassas saja per part stà difficil da chattar pavel frestg per ils animals. Vitiers èn vegnids ils stgarps dal luf e la protecziun cunter els – intginas alps da nursas han stuì vegnir stgargiadas gia l'avust.
Sper tut quai hajan intginas chaussas funcziunà bain quest onn.
Guardà sur tut ora è la stad stada fitg buna, cun las periodas umidas e lura chaudas – ed era il pastg è creschì bain.
La stad d'alp è damai stada buna. Il settember vegn la qualitad dal chaschiel d'alp numnadamain giuditgada a chaschun da la premiaziun da chaschiel d'alp en il Plantahof a Landquart, nua che las signunas ed ils signuns pon preschentar lur lavur. Era quest onn èn 87 da las stgars 100 signunas e signuns grischunas sa participadas a questa occurrenza. In eveniment da gronda impurtanza, accentuescha Svenja Simmen.
-
Bild 1 von 4. 87 signuns e signunas èn sa participads a la premiaziun da chaschiel 2025. Bildquelle: RTR.
-
Bild 2 von 4. Quatter gruppas da mintgamai trais persunas han giuditgà ils chaschiels. Bildquelle: RTR.
-
Bild 3 von 4. Bildquelle: RTR.
-
Bild 4 von 4. Tuts portan lur magnucca. Bildquelle: RTR.
«Igl è ina bella reussida, e per ils pasturs e las pasturas èsi ina finiziun da la stad d'alp», di ella. La finiziun da la stad d'alp – quest onn ina stad cun grondas variaziuns, tut en tut ina buna stad d'alp.