Stagiun d'enviern franada - Favugn maglia naiv da loipas, pistas e patineras

Avant Nadal hai dà naiv, uss cumbattan intgins lieus suenter quai bun cumanzament d'enviern gia puspè cun la mancanza da naiv. Il favugn chaud sco era la plievgia dals ultims dis han mangià ina buna part da la naiv. Cunzunt loipas da passlung, runals pitschens ed il glatsch natiral pateschan da questa midada d'aura, cunquai ch'i sa chattan en la vallada u gist sper vischnanca èn temperaturas avunda fraidas essenzialas per ch'i funcziuna. Tut quellas purschidas d'enviern vegnan per la gronda part preparadas da clubs ed uniuns sin basa voluntara.

Pertutgà en tranter auter la loipa a Trin, il runal ad Alvagni e la patinera a Trun. Ils dis da festa sajan stads in grond success cun blers osps, ma uss èn ils trais manaschis interruts.

Ils commembers da la societad cooperativa runal Alvagni na vulan tuttina betg lamentar da la situaziun. Il favrer festivescha la societad il giubileum da 50 onns. I na saja betg l'emprima giada che l'aura fa in stritg tras il quint, di Risch Tscharner, commember da la societad cooperativa runal Alvagni.

A Trun na dovra la patinera en sasez betg naiv per pudair preparar il glatsch natiral. Ils responsabels fatschentan plitost las tempraturas ch'èn da rar stadas sut nulla quest'emna. Schegea che plirs trenaments e gieus fissan planisads sin il glatsch a Trun na va il mument nagut. Tuttina restian ins quiet, declera Donat Albin ch'è commember da l'uniun da patinas. Ins saja disà da stuair esser preparà per tut las eventualitads. Planisar a lunga vista sch'i è pussibel d'avrir il glatsch n'a saja a trun betg pussibel. «Per part stuain prender ina decisiun da di tar di. In zic in frust saja quai tuttina suenter tut la lavur ch'ins haja investà durant pliras notgs.»