La prevendita dad abunaments e bigliets dal di è stada fitg buna tar tut ils territoris da skis dumandads. Blers han tuttina bleras venditas ni perfin dapli che da quest temp l’onn passà.
Nus essan ordavant cun la vendita dad abunaments e cartas dal di cumpareglià cun l’onn avant.
Recrutar persunal
Blers dals territoris da skis dumandads han chattà avunda persunal ed èn cuntents enfin uss. Cunzunt cuschinieras e cuschiniers èn dentant stgars ed insaquants territoris tschertgan anc persunas en la gastronomia, uschia tranter auter er las pendicularas da Scuol, Laax, Grüsch-Danusa e Mustér.
Persunal qualifitgà è insatge rar.
Las pendicularas dad Arosa-Lai han gì pli grondas miserias da chattar persunal ed ad els mancan anc differentas persunas en quatter ustarias en il territori da skis.
Pront per temperaturas fraidas
Las pendicularas dumandadas sajan prontas per las temperaturas fraidas, per uschia pudair producir naiv artifiziala.
Noss lai per producir naiv ha en avunda aua, uschia che nus na spetgain nagins problems pertutgant far naiv.
Dentant na tanscha la meglra preparaziun, persunal qualifitgà u chanuns da naiv pronts, sch’i na ha betg avunda naiv natirala. Ma qua na fa las responsablas ed ils responsabels anc nagins quitads:
Ils vegls Sursilvans han ditg: Sch’i dat blera puma-culaischen datti blera naiv. Uschia ch’i vegn a dar blera naiv, pertge i ha giu blera puma-culaischen.
Sche l’energia vess da vegnir stgarsa
Datti avunda naiv, èn las temperaturas èn optimalas per la naiv e las pistas e co vegn l’aura ad esser? Facturs d’intschertezza che territoris da skis han mintg’onn. Questa stagiun vegn vitiers che l’energia pudess vegnir stgarsa. Ils sportists e las sportistas a Diavolezza, il territori en l'Engiadin’Ota, han alternativas als skis.
Senz’auter, ins pensa vi da l’energia. Per fortuna po nossa famiglia er ir ensi cun l’atgna forza, vul dir cun skis cun pel.
In pau divertiment as sto avair en la vita, nus giain vinavant culs skis.
