En il Grischun èn Noah e Leonie stads ils nums ils pli populars da pops e poppas il 2022. Quai avant Mauro e Mia. Quai ha communitgà l'Uffizi federal da statistica. En l'entira Svizra èn stads Noah ed Emma ils nums ils pli populars. Sin il segund plaz suondan Mia e Liam, sin il terz Sofia e Matteo.
Nums populars en Rumantschia
En Rumantschia hai dà tar las poppas il pli savens Lia e Sofia, mintgamai trais. Suandadas vegnan ellas da Leana ed Elin. Da quellas hai mintgamai dà duas poppas. Era sch'igl n'ha dà nagina nova Maria rumantscha l'onn 2022 resta quai il num il pli derasà.
Ils blers pops sa numnan Gian u Jan, da quels hai mintgamai dà trais novs rumantschs. Cun mintgamai dus pops suandan Andrin, Diego, Elia, Flurin, Joel, Leandro, Levi, Lino, Lio e Mauro. Gian è dal reminent er il num dad umens il pli derasà.
Num da famiglia
L'Uffizi federal da statistica ha era publitgà ils nums da famiglia ch'èn ils pli frequents – e quai per mintga vischnanca. Sin la carta suten pudais cliccar sin la vischnanca per guardar ils tschintg nums ils pli frequents.
