Derungs, Caduff e Casanova – quai èn ils nums da famiglia ils pli derasads en Rumantschia. En tut portan 670 persunas in da quels trais nums, pauc cumpareglià cun ils bunamain 54'000 «Müllers» en Svizra.
L'Uffizi federal da statistica ha per l'emprima giada publitgà ils nums da famiglia.
Tar ils prenums datti en Svizra rumantscha gist plirs victurs, quai pervi da las paucas naschientschas. Tar las mattatschas èn quai Luana, Mia e Nora. Ils buobs han survegnì il pli savens ils nums Luca, Lucas, Manuel u Nico – tar omadus novs favurits.
En l'entira Svizra èn Daniel e Maria ils pli derasads nums. Noah e Mia èn danovamain ils prenums da pops ils pli populars, Noah per la segunda e Mia gia per la terza giada.
En las ulteriuras regiuns linguisticas da la Svizra èn ils favurits dal 2020 restads ils favurits da l'onn passà: En Svizra tudestga èn ils nums Noah e Mia ils pli populars. En la Svizra franzosa èn quai Gabriel ed Emma, en Svizra taliana Leonardo e Sofia. En l'entira Svizra èn radund 86'000 uffants naschids.
