En il Grischun hai dà dapli delicts criminals l'onn passà. Quai cun in plus da bun 5% sin 13'235 cas. 44% da quests cas èn vegnids sclerids. La gronda part dals cas èn il Grischun èn enguladitschs, engions e rapinas. Quai mussa la nova statistica da criminalitad dal chantun.
In augment hai dà tar ils delicts cun meds narcotics. L'onn 2024 aveva la polizia anc registrà 721 cas. Il 2025 èn quai stads 894 cas. La polizia differenziescha tranter cas en connex cun l'agen consum (possess, cumpra, diever, cultivaziun e producziun) e senza connex cun l'agen consum (commerzi illegal, cultivaziun e producziun).
Delicts da mazzaments accumplids n'hai dà nagins, en in cas hai però dà in'emprova. En tut hai dà 57 cas da greva violenza – 18 cas dapli che l'onn avant.
Trend en Svizra mussa engiu
Entant ch'il dumber da cas en il Grischun è creschì, hai dà en l'entira Svizra pli paucs delicts criminals. En cumparegliaziun cun l'onn 2024 è il dumber ì enavos per 1,5% sin 555'000 delicts. A medem temp hai però dà dapli delicts da violenza grevs e mazzaments. Ils mazzaments èn creschids sin 55. En radund trais quarts da quests cas sajan las unfrendas dunnas.
