Dal favrer 2022 enfin la fin da mars 2026 han 2'400 persunas da l'Ucraina survegnì il status da protecziun S en il Grischun. Intginas persunas èn turnadas u idas vinavant ed uschia abitan actualmain anc bunamain 1'500 persunas ch'èn fugidas da la guerra en Ucraina en il chantun Grischun. Bleras persunas hajan in'atgna abitaziun e circa 300 stattan en alloschis collectivs. Ils uffants giajan a scola ed ils giuvenils fan in giarsunadi. Tar las persunas ch'èn rivadas en il Grischun e che lavuran haja il Grischun cuntanschì la finamira d'avair 40% ch'èn occupadas.
Actualmain lavuran 385 persunas. Quai vul dir che tranter las 1'500 persunas ch'èn en il Grischun hai blers uffants e persunas pli veglias che na lavuran betg. La finamira era che 40% lavuran suenter in temp – e quai ha il Grischun cuntanschì.
En Svizra han las persunas ch'èn fugidas da l'Ucraina survegnì il status S. Ina persuna singula survegn enturn 1'000 francs per mais per viver – l'abitaziun e la cassa da malsauns èn cuvertas. Il favrer 2022 hai dà ina gronda unda da dumondas da permiss per il status S. En il Grischun sajan quai stadas pliras tschient dumondas per mais. Uss, quatter onns pli tard sajan quai anc 10 enfin 20 dumondas per mais.
Quest regress haja era da far cun la midada ch'i ha dà il november 2025. Dapi lura na survegn betg pli mintga Ucranais u Ucranaisa il status S. Sch'els derivan da las set regiuns dal vest da l'Ucraina saja quai tenor il Secretariat federal per migraziun pussaivel e segir da turnar en la patria. Quai vala per las regiuns da Oblasts, Transkarpatien e Lwiw.
Sch'ina persuna ha gì ses ultim lieu d'abitar en ina da questas regiuns na survegn quella da principi betg pli in permiss en Svizra. I dettia dentant excepziuns manegia il manader da la partiziun d'asil dal chantun Grischun, Georg Carl. Sch'ina persuna fiss là persula u sche questa persuna ha in problem medicinic ch'ella na po betg laschar tractar en l'Ucraina, na saja quai betg raschunaivel da turnar.
Da questa midada sajan mo pertutgadas persunas che hajan dumandà u dumondian in permiss suenter il november 2025. Il status da protecziun S vala per tschintg onns – cun quai ch'ina fin da la guerra n'è betg en vista èsi bain pussaivel che questa regulaziun vegn prolungada. Pia sa midass il status S en in permiss da dimora limità.