La procedura en connex cun la tragedia dal Piz Cengalo nua che tschintg persunas èn accusadas pervia da mazzament vegn ad avair lieu l'auter onn. Quai è vegnì publitgà glindesdi sin la pagina da la dretgira regiunala Malögia. La procedura è atgnamain stada planisada per l'ultim quartal da quest onn. Pervia da differentas circumstanzas vegnia il process però ad avair lieu l'auter onn, hai num sin la pagina da la dretgira.
Tar la tragedia l'avust 2017 èn mortas otg viandantas e viandants. La dretgira a San Murezzan sto ussa sclerir sch'ils accusads han valità fauss la situaziun cun betg avair serrà ordavant las sendas da viandar en la Val Bondasca.
Il 2019 aveva la procura publica grischuna serrà il cas cun l'argument che l'eveniment na saja betg stà previsibel. Quai aveva mussà ina expertisa dal chantun. Encunter questa decisiun han confamigliars da las unfrendas fatg recurs e survegnì raschun avant il Tribunal federal.
Ina nova expertisa è vegnida la fin dal 2021 a la conclusiun ch'ins avess stuì serrar las sendas da viandar, perquai ch'igl haja dà mussaments per ina pussaivla bova.
