Tenor il minister d'economia e fatgs socials Marcus Caduff dat il chantun ora tranter in mez ed in milliun francs ad onn per la prevenziun da dependenza d'alcohol.
«Quai cumenza baud – nus giain en scolas, faschain lavur da prevenziun e mussain che l'alcohol po esser nuschaivel ed è nuschaivel.»
A medem temp subvenziunescha il chantun Grischun la producziun da vin, pia la producziun d'alcohol. Da las contribuziuns chantunalas, che van mintg'onn a l'agricultura, va mo ina pitschna part a la viticultura. L'onn passà èn quai stads passa dus milliuns per l'agricultura.
Quant che va la fin finala en la viticultura n'è dentant betg pussaivel da dir tenor il chantun. Tenor Marcus Caduff na sa mordan las subvenziuns ed il sustegn per la prevenziun perquai era betg.
Sch'ins baiva mintgatant in magiel vin, sco med da giudiment tar ina buna tschaina en buna cumpagnia, lura è quai insatge auter che baiver excessivamain.
Il vin sco product da giudiment fa pia part da nossa cultura. Tge influenza che questa cultura ha sin il consum d'alcohol e sin ils dependents, vesa Patrick Lippuner da la cussegliaziun da la Crusch blaua dal Grischun dentant mintga di durant sia lavur.
El chapeschia, pertge ch'il chantun sustegnia finanzialmain la viticultura e ch'el vegnia vesì sco med da giudiment. Quella cultura possia dentant er esser problematica, di el.
Quant profund che la cultura da vin va en nossa societad, sent'ins per exempel vi da la glista da propostas che Patrick Lippuner ha en ses biro. Quai è ina glista cun ideas, tge ch'ins pudess dir, sch'ins na vul betg baiver alcohol e na vuless era betg tematisar quai grond.
Gist perquai ch'il consum dad alcohol è francà uschè ferm en la cultura, sa turpegian blers che han in problem cun l'alcohol per quai ch'els na pon betg simplamain baiver sco tschels.
Sco dunna poss'ins per exempel dir, ch'ins saja en speranza – u ch'ins prenda novs medicaments, che na cumportan nagin alcohol.
Las subvenziuns dal chantun Grischun a la viticultura èn damai plitost bassas cumpareglià cun il sustegn finanzial per la prevenziun. L'alcohol e la dependenza pon dentant tuttina chaschunar consequenzas grevas.