In mais dir Na ad alcohol u na mangiar nagina charn, ovs ed auters products d'animals. Mintg'onn il schaner emprova intgina glieud in nov stil da nutriment a chaschun dal «Veganuary» e dal «Dry January».
Trends da nutriment gia mainstream?
Tenor la cussegliadra da nutriment e docenta Lucia Winzap èn ils trends «Veganuary» e «Dry January» adina puspè populars, uschia era l'onn 2026.
Bunamain mintga otgavla persuna en Svizra saja part dal «Dry January» che vegn quest onn evaluà per l'emprima giada da l'institut svizzer per perscrutaziun da dependenza e sanadad (ISGF) per avair cifras concretas.
Quantas persunas che participeschan al «Veganuary» che vegn lantschà en Svizra da la campagna «swissveg» na sappian ins betg. Tenor in'analisa da «swissveg» da l'onn 2024 na mangia mintga 19avla persuna en Svizra nagina charn.
Lucia Winzap di che circa 5% dals Svizzers e da las Svizras èn veganas u vegetarianas – ina cumpart che crescha in zic durant il schaner. I saja cunzunt la glieud giuvna (sut 35 onns) che baiva pli pauc alcohol e mangia vegan – sche quella ha cumenzà in giada in schaner na saja betg cler.
Effects positivs vesaivels
Quanta glieud che cuntinuescha cun il nov stil da nutriment suenter il schaner na possian ins era betg dir exact. Effects positivs pon segund Lucia Winzap gia esser vesaivels suenter paucas emnas.
Mangiar e baiver pli sanadaivel haja blers effects positivs. Studis mussian ch'il livel da colesterin sa sbassia cun mangiar vegan e ch'i dat meglieraments pertutgant facturs da ristg per malsognas dal cor e da la circulaziun.
Mintga dagut alcohol pli pauc è bun per il corp.
Era baiver pli pauc alcohol possia avair effects positivs sco ina reducziun da la pressiun da sang u dal pais. Tenor la campagna «Dry January Svizra» sa sentan 80% da las participantas e dals participants pli fit ed 83% da las participantas e dals participants dorman meglier.
Sport e moviment sur onn popular
Entant ch'intgins sa concentreschan sin il nutriment, cumenzan autras ad ir en il studio da fitness. Il trend da far dapli sport l'entschatta da l'onn na saja quest onn betg stà uschè grond sco auters onns, tenor la spezialista da moviment ed sanadad Anna-Lea Spescha. Quai era perquai che sport e moviment saja insatge ch'è popular sur onn tar blers e bleras.
Glieud da differentas vegliadetgnas ha differentas finamiras. Entant che giuvens e giuvnas (tranter 25-40 onns) treneschan per in maraton u triatlon vul glieud pli veglia (tranter 40-50 onns) daventar pli movibla.
Il dumber da centers da fitness sco era il dumber da commembers e commembras è creschì en Svizra – quai mussa in rapport da «swiss active» ch'analisescha cifras da l'onn 2024.
Effects e rutinas èn fitg individualas
Tenor Anna-Lea Spescha vegnan propiests da far dapli sport bain savens era cuntinuads il favrer. Per part dettia rusnas da trenament, i gidia dentant cunzunt d'avair ina clera finamira, per exempel ina cursa.
Quants dis ch'i dovria per insumma etablir ina rutina e per vesair effects saja fitg individual. Quai dependia dal corp, da la vegliadetgna e da la finamira – furmar musclas giaja per exempel savens l'entschatta spert e suenter pli plaun.
En general haja mintga moviment in effect positiv per il corp, di Anna-Lea Spescha che porscha sezza coaching, trenaments e massaschas. In mais na saja betg exnum quai che fetschia ina gronda differenza, ma forsa in'entschatta che motiveschia da cuntinuar. Impurtant saja da guardar davent da l'emprim trenament tge ch'il corp dovra e per exempel adattar finamiras ad anteriuras blessuras.
Co cuntinuar il rest da l'onn?
I fiss natiralmain donn da chalar cun las novas bunas disas suenter in mais. Lucia Winzap ed Anna-Lea Spescha dattan tips co cuntinuar era il rest da l'onn.