Siglir tar il cuntegn

Header

cuntegn

Suenter 14 dis Chatschadur ha sajettà la luffa da Claustra

Sonda ils 24 da settember ha in chatschadur sajettà la luffa sin il territori da Claustra – quai durant la chatscha auta en il Grischun, communitgescha l'Uffizi da chatscha dal Grischun. Il chantun aveva lubì la regulaziun suenter blers stgarps da nursas la stad.

Per il manader da l'uffizi da chatscha Adrian Arquint è quai in levgiament. El spera ch'il dretg luf è vegnì sajetta, pia quel ch'ha fatg ils gronds donns. Il segund luf ch'è en il territori vegn uss observà vinavant. Igl n'è anc bletg cler sche quel resta là u sch'el sa mova vinavant.

audio
Intervista cun Adrian Arquint
ord Actualitad dals 26.09.2022.
laschar ir. Durada: 2 minutas 53 Secundas.

Suenter numerusas stgarpadas sin differentas alps a Claustra aveva il chantun dà la lubientscha da sajettar in dals dus lufs durant la chatsch'auta. Ils davos 14 dis han ils 80 chatschadurs che dastgan sajettar la luffa observà be paucas giadas ils lufs. Perquai è l'Uffizi da chatscha dal Grischun cuntent ch'ils chatschadurs han uss pudì sajettar la luffa.

L'animal vegn uss examinà patologicamain al Center per medischina da peschs ed animals selvadis a Berna. L'examinaziun genetica fa il laboratori da l'Universitad da Losanna.

Segund luf en il medem territori

En il medem territori han ins observà in segund luf. Ils organs da surveglianza da chatscha observeschan uss quest luf cun gronda attenziun.

RTR novitads 09:00

Artitgels legids il pli savens