Suenter bunamain otg onns pausa ha l'Ovra electrica Bondo en la Bregaglia puspè cumenzà a producir forza electrica. L'Ovra electrica da la citad da Turitg (ewz) ha fatg grondas investiziuns per pudair construir l'implant da nov e pli resistent suenter la bova devastanta da l'onn 2017.
Reconstrucziun ed investiziuns grondas
A partir da l'onn 2022 han teams d'inschigners examinà las pussaivladads per refar la tschiffada d'aua. Ina schliaziun provisorica è vegnida exclusa en vista a las ristgas geologicas, uschia ch'ina nova concepziun è stada necessaria dal tuttafatg. Il cussegl da la citad da Turitg ha approvà investiziuns da var 11 milliuns francs per far la tschiffada d'aua pli resistenta cunter bovas futuras.
Sfidas da construcziun e soluziuns
La construcziun ha cumenzà il fanadur 2023, è però vegnida engrevgiada tras ina nova bova ch'ha sutterrà parts dal plazzal. Grazia a mesiras sveltas da rumida e da reparatura ha il retard da construcziun pudì vegnir limità a trais mais. Per realisar las lavurs en moda sitga è l'aua da la Bondasca vegnida manada sut il plazzal atras.
Ussa vegn puspè turbinà aua
Il matg 2025 ha l'Ovra electrica Bondo puspè cumenzà a lavurar suenter vastas revisiuns da las cumponentas mecanicas, e suenter la renovaziun dal conduct da pressiun. L'implant producescha ussa radund 18 uras gigawatt electricitad per onn.