La citad da Cuira porscha sper l’abunament general per tuttas purschidas da sport e da wellness – da l’implant da sport Obere Au «Au dabi» era puspè abunaments mo per l’aua e mo per il glatsch. Quai ha decis il cussegl da la citad en sia sesida dal mardi suenter ch'igl ha dà critica dal pievel. Ins haja reagì sin in basegn da la populaziun, hai num en ina communicaziun.
Divers abunaments vegnan purschids
I dat puspè abunaments da stagiun mo per il diever da l’aua durant la stad u era mo per il diever dal glatsch durant ils mais d’enviern. Vinavant datti era puspè in abunament da l'onn be per l'aua cur che la revisiun dal bogn cuvert è terminada, davent dal prim da fanadur. Uschia datti la suandanta variaziun dad abunaments per la Obere Au – e quai mintgamai cun ina differenza da pretsch per indigens e persunas d'ordaifer:
- Abunament da l'onn «Au dabi» (creschì, uffant, famiglia)
- Abunament da stagiun «Au dabi» (creschì, uffant, famiglia)
- Abunament da l'onn per aua (creschì, uffant)
- Abunament da stagiun per aua u glatsch (creschì, uffant, famiglia)
Per dar ina dimensiun: Il pretsch da l'abunament annual «Au dabi» ch'includa tut las purschidas munta a 479 francs per creschids e 239 francs per uffants (pretschs per indigens). L'abunament annual «be aua» ch'il cussegl da la citad ha uss reintroducì custa 400 francs per creschids e 225 francs per uffants (pretschs per indigens). L'abunament da stagiun, vul dir be stad u be enviern, en la varianta «Au dabi» cun tut las purschidas, custa 148 francs per creschids e 64 francs per uffants (pretschs per indigens). La varianta dal medem abunament be per glatsch u be per aua custa 128 francs per creschids e 64 francs per uffants (pretschs per indigens).
Sin squitsch da la populaziun
Il president da la citad Urs Marti declera che las reacziuns mussian ch'i dovri ussa questa adattaziun. Igl haja dà bler resun critic cunter la purschida da be in abunament all-inclusive senza variantas pli bunmartgadas per be ina stagiun e be aua u glatsch.
Plinavant declera il president da la citad da Cuira che giasts che han gia cumprà l'abunament «Au dabi», avessan dentant pli gugent be quest dals bogns, possian far questa midada e survegnan enavos la differenza. Enfin ussa hajan ins già vendì 1'200 «Au dabi» abos, quai che mussia ch'il trend dad all-inclusive, pia d'avair tut en in abunament, saja tuttina dumandà.
Ils petiziunaris èn per part cuntents cun la sliaziun
Daniel Bisculm, l'iniziant d'ina da las petiziuns cunter igl «Au Dabi», cun dapli che 2'000 suttascripziuns, beneventa la nova decisiun da la citad. El chatta quai bel ch'intginas da las pretensiuns sajan vegnidas resguardadas. Gea, il parcadi saja gratuit, dentant giuvenils ed uffants n'hajan nagut da quai. Er fissi bun d'avair pretschs reducids durant las uras marginalas. Daniel Bisculm spera che la citad repndereschia anc ina giada lur pretschs.
