Cumenzà cun il project ha Arne Polage da Düsseldorf. Durant emprender sursilvan ha el constatà ch’igl n’è betg simpel da chattar l’infinitiv da verbs irregulars sco «seigi» u «mondi». Cun ils documents da PDF pon ins uss chattar l'infinitiv a moda e maniera facila cun la funcziun da tschertga. Gist cura ch’el haja legì la gasetta rumantscha saja magari stà stentus da chattar l’infinitiv dal verb. Uss n’è quai nagin problem pli. Per crear ils documents che cumpiglia tut en tut varga milli paginas haja el investì 100 uras da ses temp liber.
Glistas da verbs sursilvans
Sviluppar vinavant
Il 2018 è era Emanuel Brühlmann sa participà al project ed ha anc ina giada agiuntà radund 500 verbs. Cun agid da collegas ed d’in professer da l’universitad da Friburg han els dus cumplettà la glista. Tenor Emanuel Brühlmann saja quella glista in stgazi per tuttas e tuts che vulan emprender rumantsch. Durant il davos curs tradiziunal da rumantsch sursilvan han els dus preschentà e dà liber la glista al public. Ils resuns dals participants dal curs sajan stads fenomenals.
Emanuel Brühlmann declera ch’il project na saja ussa betg terminà. Era en il futur veglian els agiuntar anc dapli pleds, uschia che la glista crescha ad in crescher.
