L’emprima bilantscha suenter 100 dis croda or positiv. Il nov president communal da Glion ha gì in'entschatta intensiva cun blera lavur da sa lavurar en.
L’entschatta è stada intensiva. Il sa lavurar en tar tut ils dossiers dovra bler temp ed era la preschientscha a tut las sesidas e radunanzas fan intensiv l'uffizi.
Fatschentà il pli fitg durant quels dis haja sur tut l'areal da la staziun nova a Glion. Là haja dà intgina seduta dad ir e da sa discurrer. Là saja uss da sperar ch'i na dettia nagins recurs encunter il project planisà.
Sco segund numna Beer la nova constituziun communala che vegnia ed er la lavur dal mintgadi cun bleras dumondas da respunder. La revisiun totala ha dà grondas discussiuns. Il parlament ha er tema ch'el vegn forsa abolì. Marcus Beer spera dentant che quel resta. Pertge cun la gronda vischnanca fissi fitg grev da realisar radunanzas communalas.
Tempo 30 en la citad
Sin l'entir intschess duai dar la limita da tempo da 30 kilometers l'ura. Quest tema vegn dictà da surengiu, dal chantun, sco Beer ha declerà. Quest pass vegnia realisà quest onn. Tenor el dettia quai dapli qualitad da vita a la citad.
Da quels che van sco Niki Lauda qua tras, quai na dovri betg.
Iniziativa solara
La vischnanca da Glion ha survegnì dumondas d'organisaziuns per construir indrizs fotovoltaics sin l'intschess. Ma questas dumondas sajan actualmain pendentas. Qua na possia el betg anc tradir dapli. Ma planisà fiss lura da far insatge sumegliant als implants a Tujetsch ed a Mustér.
