Siglir tar il cuntegn

Header

cuntegn

Vischnanca Glion Trais candidats cumbattan per il presidi

Carmelia Maissen cumenza il schaner 2023 sco cussegliera guvernativa en la regenza grischuna. Ils trais candidats per sia successiun en il presidi da Glion én Claudio Quinter, Silvio Dietrich e da nov Marcus Beer.

Marcus Beer, il candidat independent

Marcus Beer ha annunzià da candidar sco independent per il presidi da la vischnanca da Glion. Beer è scolast al Center da furmaziun Surselva. Avant è el stà passa 10 onns il manader da questa scola.

audio
Marcus Beer vul dar a la populaziun ina schelta tar l’elecziun.
ord RTR Audio dals 21.07.2022.
laschar ir. Durada: 15 Secundas.

Sin dumonda da RTR ha la Partida liberaldemocratica declerà ch'els na tschentian si nagin candidat. Suenter l’elecziun da la presidenta communala Carmelia Maissen en la regenza grischuna, ha lieu ils 21 d’avust 2022 l’elecziun substitutiva per il presidi communal da Glion.

Silvio Dietrich vegn nominà da la PS

Sco segund è Silvio Dietrich sin la glista per surpigliar il presidi da la vischnanca da Glion. Il deputà dal Cussegl grond veglia s’engaschar anc dapli per la vischnanca, scriva la PS Surselva, che nominescha el per quest post. Dapi la fusiun da la vischnanca da Glion è Dietrich mainascola principal e commember da la direcziun da la vischnanca. Plinavant ha el dapi 4 onns sia atgna fatschenta da cussegliaziun per tut las gruppas en mira da la scola.

Sia motivaziun per s'annunziar saja stà d'ina vart l'elecziun en il Cussegl grond, dentant er ch'i dovria suenter 25 onns sco mainascola ina midada.

audio
Silvio Dietrich: «Temp per far ina midada suenter 25 onns mainascola a Glion»
ord RTR Audio dals 14.07.2022.
laschar ir. Durada: 17 Secundas.

Sco Dietrich ha declerà ad RTR vul el mantegnair il pensum da 20% ch'el fa cun sia fatschenta da cussegliaziun. Per cuntinuar sco mainascola, vegnia dentant grev. Per el ina midada andetga ch'el ha er sco emprim stuì discussiunar cun sia famiglia.

Allianza dal Center nominescha Claudio Quinter

L'Allianza dal Center Foppa ha nominà a sia radunanza generala l'interprendider Claudio Quinter sco candidat per il presidi da la vischnanca da Glion. El è stà l'emprim interessent per il post.

Gia ordavant aveva Claudio Quinter (AdC) confermà ad RTR ch'el saja pront da candidar per il presidi communal da Glion. El haja discutà la situaziun cun sia famiglia ed è persvas d'ademplir las premissas per daventar successur da Carmelia Maissen (AdC) che cumenza il schaner ses uffizi en la regenza grischuna.

audio
Claudio Quinter sa senta capabel, e spetga sin la nominaziun da la partida
ord RTR Audio dals 23.06.2022.
laschar ir. Durada: 24 Secundas.

Quinter è actualmain commember dal parlament da Glion e manader da fatschenta d'ina firma d'immobiglias. Ils onns 2020 e 2021 è el stà president dal parlament communal.

RTR novitads 12:00+

Artitgels legids il pli savens

Scrollar a sanestra Scrollar a dretga