Il maraton da la Surselva è ina cursa organisada en il rom dal «Swiss Lopet», ina seria da cursas popularas davent dal schaner fin il mars. Era part a quella seria da cursas fan tranter auter il maraton da l’Engiadina ed il «Planoiras». Il maraton da la Surselva è nà da la topografia ina da las cursas pretensius en questa seria, declera il president dal comité d’organisaziun Guido Friberg. Perquai saja il dumber da participantas e participants sin nivel constant – sur ils onns dettia ina sminuziun. Uchia saja la finamira clera: Mantegnair almain il status quo da tranter 200 e 250 curridras e curriders, accentuescha Guido Friberg.
Annunzias vegnan tard
Quest onn saja uschia che las annunzias vegnian pir l’ultim mument. Las curridras ed ils curriders guardian sin l’aura; E sche las prognosas sajan bunas, lura vegnian els, era perquai che lura sa sentian ins pli segir, di il president dal comité d’organisaziun.
Sco mesira da segirtad ha il comité d’organisaziun serrà l’areal enturn il center da sport Dulezi, nua che l’arrivada sa chatta. Qua valian las reglas da 3G. Ed els recumondian da purtar ina mascrina, sch’ins na fetschia betg sport. Aspectaturas ed aspectaturs possian però tuttina vegnir a guardar la cursa, accentuescha il president.
Curriders d’elita a la partenza
Ils ultims onns èn stads plirs curriders professiunals a la partenza a Sedrun. Cun quai ch’ils gieus olimpics stattan avant porta na possian ins betg quintar cun ils top atlets. Ins spera ch’ils caders naziunals e regiunals vegnian cun lur curriders a la partenza, di Guido Friberg. La sonda èn gia las concurrenzas dals uffants e giuvenils en il rom dal «Raiffeisen Nordic Cup» e dal cup regiunal. Qua vegnian rodund 150 uffants e giuvenils ad esser a la partenza.
