Ils davos dis èn bun 180 atletas ed atlets sa participads a cursas dals campiunadis svizzers en la Val Tujetsch. Dasper l’entira elita svizra èn er bleras passlungistas e passlungists da la naziunala tudestga sa participadas. Aura perfetga, loipas da siemi e cursas spectacularas: uschia pon ins resumar quests dis da cursa, manegia il president dal comité d’organisaziun. Pervia da la pandemia da corona han las cursas dentant gì lieu senza public.
Campiunadis svizzers en duas parts
Gia mez schaner era vegnì organisà l’emprima part dals campiunadis svizzers a Sedrun. Lura eran stadas sin il program las cursas da distanza curta e quellas da persecuziun. A la fin da la stagiun uss la fin mars han Dario Cologna e collegas anc cumbattì a Sedrun per medaglias en las cursas da sprint ed en las cursas da distanza.
