Per bleras persunas èsi stà la sonda passada l’emprima giada ch’els èn puspè stads en ina ustaria a tschaina e ch’els han puspè visità ina occurrenza culturala. Uschia saja quai stà sco dad ir en sortida cun 16 onns ha ina dunna ditg a Cumbel. Ma che quai è tut puspè sco pli baud n’è betg il cas. Uschia han tut las ustarias stuì reducir il dumber da maisas e respectar las reglas da l'Uffizi da sanadad. Forsa gist pervi dal coronavirus eran quasi tut las ustarias vendidas ora.
Ma er per ils artists e las artistas èsi stà in levgiament da puspè pudair sa preschentar davant il public. Chiara Jacomet e sia band da quatter dunnas han per exempel dastgà sa preschentar en l'Ucliva a Vuorz. Er sche las dunnas na vivan betg da la musica èn ellas cuntentas che la pausa sfurzada è a fin.
Il concept da la notg culturala
La «Notg culturala Surselva» è vegnida organisada per la quarta giada da la banca Raiffaisen Surselva. Il concept da la notg culturala funcziunescha mintg'onn tuttina: Las radund 35 ustarias porschan ina tschaina e las artistas ed ils artists il dessert cultural. Ils giasts tschernan il restaurant senza dentant savair, tge artista u artist che sa preschenta là. Ed era las artistas ed ils artists vegnan pir l’ultim mument a savair nua ch’els han dad ir.
Per l’organisatura, la banca Raiffeisen, èsi impurtant che tut las artistas ed ils artists survegnan la medema pussaivladad da sa preschentar, n'emporta betg quant enconuschent ch’els èn.
