Siglir tar il cuntegn

Header

cuntegn

5G a Mustér Ina gruppaziun rimna suttascripziuns

A Mustér datti opposiziun cunter ina dumonda da bajegiar per ina antenna da 5G. Plazzada vegniss quella sin ina pitga d’auta tensiun, nua ch’i dat gia bleras antennas. Il mument vegn rimnà suttascripziuns e la protesta è sin maisa.

Larissa Fry Schuster è stada fitg surstada, cura ch’ella ha cumenzà a retschertgar en connex cun 5G. Actualmain existan gia duas antennas da 5G sin intschess da la vischnanca da Mustér. Quai na saja betg correct da simplamain augmentar la radiaziun sin 5G senza infurmar la populaziun, di la commembra dal parlament communal. Perquai saja uss impurtant da betg seser sin la bucca, mabain d’agir svelt. La populaziun haja il dretg sin infurmaziun, d’ina vart sur dals lieus d’emetter tals radis da 5G, ma er sur da las consequenzas che la radiaziun possa avair, di la mamma da quatter uffants.

audio
Opposiziun cunter antenna da 5G a Mustèr
03:06 min, Actualitad dals 15.03.2021.
laschar ir. Durada: 03:06 minutas.

Pitschnas schanzas

Sco il parsura da l'Uffizi d’ambient dal Grischun, Remo Fehr, ha ditg, sajan las schanzas tar in recurs dadas sulet, sche la radiaziun vegnia augmentada. Sche quels radis restian tuttina ferms, era cun 5G, e radieschian en la medema direcziun, alura na saja la basa legala per intervegnir betg dada. Las interpresas tschertgian dentant savens il dialog cun la populaziun, sch'i dettia resistenza. En quel cas pudess la vischnanca per exempel proponer in auter lieu per montar l’antenna nova. Ma obligada na sajan las interpresas betg. Era betg adina dad inoltrar ina dumonda da construcziun sco en il cas a Mustér, di Remo Fehr.

Protesta è sin maisa

Communabel cun autras persunas ha Larissa Fry Schuster elavurà ina protesta. Quella saja uss ina giada drizzada cunter la dumonda da construcziun. Pli tard vegnian ins alura era ponderar co agir en connex cun las antennas gia en funcziun. Ma els na saja betg cunter il svilup, els sajan simplamain cunter in svilup che vegnia realisà senza avair enconuschientschas scientificas en connex cun 5G. La populaziun na saja betg qua per far experiments en favur dal svilup sin donn e cust da la sanadad, di Larissa Fry Schuster.

RTR actualitad 12:00

Artitgels legids il pli savens

Scrollar a sanestra Scrollar a dretga