Blera glieud è sa radunada la sonda suentermezdi per dar l’entschatta a las festivitads da 600 onns Ligia Grischa Trun. Dasper las autoritads represchentadas da l’avat da la claustra da Mustér Vigeli Monn, da cusseglier guvernativ Marcus Caduff e dals presidents communals da las vischnancas da Trun e vischinas eran era las scolaras ed ils scolars da Trun preschents. Mintgina e mintgin ha alura pudì dir lur giavisch u siemi per l’avegnir, uschia han ins vulì far la punt da l’istorgia en l’avegnir. Il punct culminant è segir stà cura che l’entir pievel ha chantà communabel l’enconuschenta chanzun «A Trun sut igl ischi». Silsuenter è l’entira raspada sa rendida, la musica da Trun ordavant, encunter la Cuort Ligia Grischa nua ch’il museum ha lantschà cun la vernissascha da l’exposiziun las festivitads da 600 onns Ligia Grischa.
Comité d'organisaziun ha fatg trais onns lavur da preparaziun
Il comité d’organisaziun che vegn timunà da la suprastanza communala da la vischnanca da Trun ha lavurà ils ultims trais onns vi da l’organisaziun. Uschia vegnia quai a dar trais occurrenzas grondas ch’embelleschan il giubileum, declera il president communal e president dal comité d’organisaziun Dumeni Tomaschett. Ed el sa legra che quai va finalmain liber proxima sonda.
«Ligia Grischa sin viadi istoric»
L’emprima occurrenza gronda vegn ad esser il concert da l'enconuschent chor Ligia Grischa. Quel vegn a dar en tut quatter concerts davent da Trun fin en il Mesauc, nua ch’il chor vegn mintgamai accumpagnà d’ina furmaziun locala. Accumpagnadas vegnan las producziuns musicalas da prelecziuns da l'istoricher Adolf Collenberg che lai reviver l’istorgia, sco era detgas e legendas en connex cun la Ligia Grischa.
«Ditgas e fatgs d’ina perditga mitta»
Il concert multimedial è ina cumbinaziun da musica e film. Quasi in film documentar cun musica live, uschia ha Clau Scherrer ditg a la conferenza da medias en la Cuort Ligia Grischa. En il center stat l’istorgia da l’ischi, da la planta sezza, la perditga mitta, ma era co l’ischi sez è daventà il simbol e la perditga mitica da la Ligia Grischa. En quest concert multimedial èn d’udir e vesair il chor cecilian Trun, il Cantus Firmus ed in chor d’uffants cun scolaras e scolars da la scola da musica. Cumponì las chanzuns era contemporanas ha Lorenz Dangel, la reschia maina Gieri Venzin e la direcziun musicala ha Clau Scherrer.
Teater en il liber – ina cumedia seriusa
Il teater en il liber è l’ultima da las trais occurrenzas grondas. El vegnmussà sin il prà sut la baselgia en il vitg da Trun, in spazi ideal per in toc da teater en il liber, ha Esther Berther la manadra da producziun accentuà. Impressiun ha surtut fatg che bleras persunas vulevan far part a l’inscenaziun e perquai han ins la finala era anc integrà l'ina u l’autra rolla. Uschia giogan la finala 27 acturas ed acturs il toc scrits da Michel Decurtins. La reschia ha René Schnoz e la musica è vegnida cumponida a posta per il toc da Mario Pacchioli. Il toc gioga sapientivamain en il temp dad oz, ma cun inspiraziuns dals fatgs istorics da la Ligia Grischa. La dumonda centrala dal toc vegn ad esser, èsi uras per ina nova lia?
Dasperas occurrenzas en il Museum sursilvan ed autras
Il museum regiunal sursilvan Cuort Ligia Grischa ha mess ensemen in'exposiziun istorica che lai reviver in di da «Sogn Gieri» en la «Cuort Ligia Grischa». Inspirà dals protocols da l’onn 1698 vegnan las persunas numnadas en quest protocol descrittas, ed en in gieu auditiv vegnan las visitadras ed ils visitaders manads tras in tal inscunter tradiziunal dals delegads da lez temp. Dasper quest'exposiziun istorica auditiva datti era ina exposiziun d’art contemporan cun il titel grisch. 16 artistas ed artists exponan lur creaziuns multifaras durant l’entir onn en il museum. Era part da las festivitads fa il curtin d’onur da la «Surselva Romontscha», la successura da la Romania e la Renania. Qua vegnan sis novas persunalitads cun merits per la lingua rumantscha undradas. Lezza festivitad vegn alura ad esser l’ultima d’in lung onn da festa a Trun.
