Il suveran da Mustér ha refusà cleramain cun 613 cunter 292 vuschs in credit da 1,85 milliuns francs per renovar la Via Cons. Uschia sto la suprastanza communala elavurar in nov project damai che la sanaziun da la via sco tala è urgenta e nundispitaivla.
Il project è stà contestà
La sanaziun da la Via Cons è stada en la critica perquai che la vischnanca ha era gist vulì nizzagiar la chaschun da midar ils parcadis tranter la scola e la baselgia sin tschella vart da la via e crear in spazi da sentupada sin il senteri. Ils adversaris eran da l'avis che quai na saja betg raschunaivel ed ins possia renovar la via bler pli bunmartgà.
Previs eran investiziuns totalas da radund 2,2 milliuns francs. La sanaziun da la chanalisaziun vegn finanziada cun meds ord la finanziaziun speziala, quai che munta ina summa da 335’000 francs. Quel credit è gia vegnì approvà ils 16 da favrer 2024 en atgna cumpetenza dal parlament communal.
