La via da Cons a Mustér maina davent da la via Lucmagn dasper la chasa communala, la chasa da tgira Puntreis, la baselgia parochiala e la scola fin ch’ella sbucca sisum en la via principala en direcziun dal pass Alpsu. La via è fitg taissa e vegn utilisada stediamain e perquai basegna ella d’ina sanaziun. Er na vegnan las auas persas il mument betg spartidas e perquai vegni regularmain da fermas plievgias tar inundaziuns da las chasas che sa chattan giudim la via Cons. Che quai basegna d'ina sanaziun na metta nagin en dumonda, ma co far la sanaziun.
Project communal vul augmentar il spazi da scuntrada
La vischnanca da Mustér ha preschentà in project per sanar la via e la chanalisaziun, ma er per augmentar la qualitad da l’entir areal cun stgaffir dapli spazi per scuntradas. Uschia vegnan ils parcadis ch’èn il mument sin vart da la scola dischlocads da l’autra vart da la via cunter la baselgia. Cun quai vegnan ins d’augmentar la segirtad per ils uffants ch’han da traversar la via e na ston betg far pli quai tranter ils autos ora, di il president communal René Epp.
Plinavant possian ins stgaffir tar l’entrada da la baselgia dapli plazza per scuntradas ed uschia gist nizzegiar la sanaziun per meglierar l’entira situaziun, argumentescha il president communal. Previs èn investiziuns totalas da radund 2,2 milliuns francs. La sanaziun da la chanalisaziun vegn finanziada cun meds ord la finanziaziun speziala, quai che munta ina summa da 335’000 francs. Quel credit è gia vegnì approvà ils 16 da favrer 2024 en atgna cumpetenza dal parlament communal. Sur dal rest da la summa, en autezza da radund 1,85 milliuns francs, ha la populaziun da decider ils 14 d’avrigl.
Pertge far talas midadas e surdorar la via?
La via d’ina lunghezza da radund 350 meters vegn pia sanada per dapli che dus milliuns francs. Quai crititgescha il president da la plaiv Sogn Gions ed anteriur president communal Aldo Tuor. Che la via dovra ina sanaziun n’è betg dispitaivel, ma senza dislocar parcadis e vulair far in plaz da scuntrada en il santeri, di Aldo Tuor. La segirtad na vegnia cun midar ils parcadis sin l’autra vart da la via betg augmentada, anzi ella vegnia mendra, di Tuor. Er na dovria betg dapli spazi da scuntrada, quel spazi saja gia avant maun en vischinanza ed il santeri na saja betg il lieu ideal per crear tals spazis, argumentescha Aldo Tuor. Per el saja il project simplamain surdimensiunà, atgnamain bastia da far las lavurs da sanaziun necessarias.
