Siglir tar il cuntegn

Header

audio
Il president René Epp declera ils plans
Or da Actualitad dals 07.11.2022.
laschar ir. Durada: 3 minutas 58 Secundas.
cuntegn

Mustér Dapli plaz per scuntradas e pli paucs parcadis

La suprastanza communala preschenta tschintg puncts co far pli attractiv la vischnanca. Remplazzar parcadis cun bancs e vegetaziun, acquistar terren e far accessibel a la publicitad èn intgins pass proponids.

Ina da las mesiras, che po probabel vegnir realisada il pli simpel, è la Via Cons. Gia oz saja là in lieu da scuntrada cun la scola, il center da sanadad Puntreis e la baselgia. Quai ha ditg il president communal René Epp a la preschentaziun en la claustra da Mustér. Planisà saja da realisar ina zona da scuntrada cun reducir la spertadad dal traffic motorisà sin 20 kilometers l’ura. Questa mesira e dapli spazi da scuntrada saja simpel da realisar a la Via Cons, perquai che quai sajan tut vias communalas.

Nov center dal vitg

In'autra mesira pertutga l’areal da la chasa communala. Qua duain plirs parcadis vegnir schliads ed amez duai vegnir realisà ina funtauna. Sche quai è lura ina funtauna existenta che vegn dischlocada u ina nova construida, n'è anc betg definì. Era duain parcadis svanir amez il vitg – tar las sbuccadas da las vias Alpsu e Lucmagn. Qua duai vegnir creà il nov center dal vitg cun bancs per seser, cun plantas ed ulteriurs elements ch’envidan da passentar temp. Per remplazzar ils parcadis duai vegnir elavurà in nov concept da parcar.

Curtin da la «casa Hess» duai vegnir accessibel

En ina segunda etappa duai alura la «casa Hess» e ses curtin, situà amez il vitg, vegnir acquistada e vegnir accessibla a la publicitad. Paucas vischnancas han ina tala reserva da terren amez vischnanca e quella vala la paina d’activar, uschia il president da vischnanca René Epp. Els hajan gia manà discurs intensivs cun ils possessurs ed hajan dacurt inoltrà ina offerta da discussiun. Uss stoppian ins mantegnair ils buns contacts e sperar che la cumpra daventia realistica, pertge cun quest spazi pudess il center dal vitg propi vegnir pli attractiv.

In ulteriur lieu che la suprastanza communala vul activar e far accessibel è la plazza cumin sut la claustra da Mustér. Era qua vegnian ins a tschertgar il dialog cun la claustra e sperar da chattar ina soluziun.

Contactar chantun ed alura quintar ils custs

Il proxim pass saja d’infurmar il chantun. Senza il sustegn da l'Uffizi da construcziun bassa na possian ins betg far bler, ha declerà il president communal. Ils emprims discurs sajan dentant positivs e quai dettia speranza. En in terz pass è planisà da far sur l’entir center dal vitg ina zona da scuntrada. Quai basegna dentant in sviament, ma in tal resta la finamira finala da tut. Per vegnir da realisar dovri dentant anc dapli sustegn dal chantun e probabel ina intervenziun en il Cussegl grond a Cuira, uschia Epp ch’è era deputà a Cuira.

Via da guaud per la segunda

Sco ulteriur project è vegnì preschentà l’avertura Val Segnas Uaul Run. Gia per la segunda giada aifer curt temp ha la populaziun da Mustér da votar davart in project d’avertura. L’emprim project aveva fatg naufragi il november 2020. Surtut las auas en la Val Clavaniev avevan dà da discutar e la finala manà a la decisiun cunter il project. En il project actual na vegnan questas funtaunas betg pli traversadas, ha declerà il suprastant responsabel Clemens Berther.

La finamira resta dentant da pudair tgirar a moda pli effizienta ils guauds da protecziun en vischnanca. Nagina autra vischnanca en Surselva saja uschè dependenta d’ina protecziun tras il guaud sco la vischnanca da Mustér, ha il selvicultur communal Simon Cathomen accentuà a la preschentaziun. En tut èn calculads custs da radund 25 milliuns francs, da quels surpigliassan chantun e Confederaziun radund 18 milliuns. Cun ulteriuras donaziuns, per exempel dad Alpinfra, resta a la vischnanca da Mustér ina summa da 5,6 milliuns francs. La populaziun da Mustér decida a l’urna ils 27 da november.

RTR novitads 06:00

Artitgels legids il pli savens

Scrollar a sanestra Scrollar a dretga