La regenza ha approvà la revisiun parziala da la planisaziun locala ch'il cussegl communal da la vischnanca da Mustér ha approvà ils 25 da mars 2022. Quai scriva il chantun en ina communicaziun. Uschia vegn creada la basa legala per construir ina punt pendenta dal vitg da Mustér a la fracziun da Mumpé Medel. Cun la construcziun planisada duai vegnir stgaffida ina colliaziun directa sur il Rain per pedunas e peduns. Ultra da quai duai la punt pendenta vegnir duvrada per intents turistics.
Era in avantatg per la selvaschina
La chavorgia dal Rain tranter Segnas e Fontanivas è in impurtant quartier d'enviern per differentas spezias d'animals selvadis (en spezial tschiervs, chavriels e chamutschs). Actualmain vegn il territori per part er visità durant l'enviern da viandants sco er da curriduras da gianellas, quai che chaschuna situaziuns da disturbi en quest spazi da viver delicat. La punt pendenta planisada duai porscher in'alternativa attractiva a la via da colliaziun tras la chavorgia.
