«En nossa fatschenta stat la famiglia en il center. Roland Albin è il manader da fatschenta ed er il frar Mario lavura tar Albin SA ed è il grond spezialist da vin. Tar occurrenzas, sco per exempel la gronda degustaziun annuala, lavuran tut ils frars e lur uffants maun en maun.» Quest text è da chattar sin la homepage da la Albin SA, anc pli enconuschenta cun il num Albin Vin e Bavrondas da Trun.
La cussegliaziun ed il commerzi cun vin e bavrondas è stà ses servetsch professiunal ils ultims decennis. Che quai è capità ils ultims 40 onns en in grond bajetg gist sper la plazza da ballape a Trun n'è betg casual, mabain significativ. Ils quatter frars Werner, Mario, Roland ed Armin èn stads passiunads giugaders da ballape ed èn engaschads onns a la lunga en ina furma u l'autra tar il CB Trun, respectivamain CB Trun/Rabius.
Nus na stuain betg – nus dastgain chalar.
La fin da zercladur 2026 va l'era da l'interpresa da famiglia Albin a Trun a fin.
Transports, vin e bavrondas
A l'entschatta da l'interpresa Albin SA a Trun avant radund 75 onns n'eran betg vin e bavrondas. «Entschet ha tut cun il tat Benedetg. El fascheva il camiunage a Trun; manava rauba cun char e chaval da la staziun da la viafier tar ils vischins. Sco buobs dastgavan nus gidar ina giada u l'autra. Il bab Lorenz è ì en quests fastizs. El ha cumprà in auto da vitgira e pli tard ulteriurs vehichels», sa regorda Roland Albin.
Entschet ha tut cun il tat Benedetg.
Cun ses vehichels ha el manà material sin plazzals, per exempel cement per la construcziun dals mirs da fermada u il necessari per construir las lavineras sur Trun. «Il bab fascheva dentant anc auters servetschs: Charrar en l'ospital a Glion cun dunnas ch'avevan da parturir, transportar fain e purschels per ils purs ed ina u l'autra giada er ir ordaifer per ina bara. Tar sia incumbensa appartegneva pli baud er il transport da rument», di Roland Albin.
Il 1986 è la famiglia Albin lura sa decidida per il commerzi da vin e bavrondas. Dus onns pli tard è la halla sper la plazza da ballape a Pustget vegnida construida per quest intent.
Ils temps sa midan
Che l'interpresa Albin SA serra sias portas la fin da zercladur 2026 ha plirs motivs. «Il temp è sa midà. Mes frar Mario ed jau essan en la vegliadetgna da circa 70 onns ed uschia en il temp da chalar da far fatschenta. Ina successiun en famiglia n'avain nus betg vulì ed era betg tschertgà», di Roland Albin ch'è dapi il 2005 mainafatschenta da l'interpresa.
Ins saja bain stà en discussiun cun autras interpresas da la medema branscha, ma era là na saja sa dada nagina soluziun. «Igl è dentant er uschia che bleras ustarias han serrà u serran ed en las chamonas alpinas vegn la rauba sgulada cun helicopter. Latiers vegn la mobilitad d’in e mintgin ozendi, la dependenza ch'insatge vegnia furnì a chasa n'è betg pli. Facit: Nus vendain pli pauc che pli baud», declera Roland Albin e punctuescha:
Igl è stà fitg emoziunal da declerar a la clientella che nus serrain l'affar.
15 onns ha l'Albin SA pudì furnir bavrondas a la Neat a Sedrun. Ella è stada engaschada per part en l'entira Surselva fin a Flem. La halla è tant sco vendida ed ils 13 da zercladur 2026 fa la Albin SA per ina davosa giada viva cun sia clientella en l'affar en il conturn da Pustget. Lura guarda l'interpresa enavos sin in temp da fatschenta da radund 75 onns. Il zercladur fa ella er acziuns spezialas. «Quai che resta consumain nus sezs», di Roland Albin cun bucca rienta.
In servetsch da tut temp
Sper privats e la gastronomia, ma er autras instituziuns e fatschentas, ha la Albin Vin e Bavrondas SA tgirà bunas relaziuns cun las uniuns. A numerusas occurrenzas ha ella furnì vin, bavrondas e spirituosas, ma er l'infrastructura latiers. «Nus avain gì buns collavuraturs e blera buna e fidaivla clientella. Quella avain nus dentant era pupragnà e furnì rauba per part era durant la notg u las dumengias», di Roland Albin.
Sper in bun servetsch sajan las relaziuns persunalas stadas fitg decisivas en tut quels onns. Cun plaschair guarda el dentant er enavos sin ils inscunters en la stiva da vin en l'edifizi da l'affar u era sin las degustaziuns annualas en la sala da cultura a Trun cun per part 300 participantas e participants.