Sin l’alp «Pastira Sura» sur il vitg da Degen è in vadè vegnì attatgà d’in tschess cularin. Sco il pur pertutgà Gionin Caduff ha ditg, saja el vegnì contactà dal pastur che na chattava betg pli l’animal novnaschì. Pli tard han ins chattà l’animal anc viv ed il veterinari clamà ha stuì durmentar l’animal. Vis ils utschels u il singul utschè n’han ins betg, ma las blessuras vi da l’animal na possian betg vegnir decleradas auter che d’in tschess cularin, declera Gionin Caduff.
Co vai vinavant cun quels utschels?
Livio Rey, il pledader da medias da la Staziun ornitologica svizra da Sempach, è surstà dal cas actual e discurra vinavant d’in cas singular ed extraordinari. Uss stoppian ins sclerir pliras dumondas. Tenor il pur è quai l’emprim vadè da quella vatga, sche quai saja la raschun per questa sperdita na possian ins betg dir. Per el muntia quai ina sperdita da radund 3’000 francs, perquai che la vatga vegnia betg a dar latg l’enviern proxim ed il vadè na possia era betg vegnir vendì.
