Sia carriera va lunsch enavos. Perquai, tgi po schon pretender ch'el ha dà scola da skis durant 50 onns? Aluis Cathomen da Breil po far quai. Ed en sasez èsi perfin stà pli ditg che «be» 50 onns. Perquai, cumenzà aveva tut vi Flem. Là era Heini Caduff il manader da la scola da skis a la tschertga da scolasts da skis. Uschia ha el era dumandà Aluis Cathomen, ch'ha dà tiers. Sco pur era quai ina variaziun bainvegnida. Quai eran ils onns 1971 fin 1973.
Be paucs onns pli tard, l'onn 1974, è lura vegnida fundada la scola da skis a Breil. Da lez temp anc sut il num «Scola da skis Rubi», sco la muntogna sur Breil sin il Kistenpass. Fundà aveva Aluis Cathomen ella ensemen cun ses amis Marcus Friberg, Venanzi Cantieni e Tadeus Cathomas. Da lez temp era quai tut pli simpel, organisà n'era nagut. Els gievan simplamain sin il plaz e guardavan sch'insatgi era là. E sche betg n'era quai era betg uschè nausch, ils quatter fundaturs savevan era uschiglio co sa divertir sin pista, era senza giasts.
In zic mal fai bain, jau vegn bain a laschar encrescher.
Instruì ha el bain dapli che milli persunas, da pitschen enfin creschì. E qua datti inqual istorgia da raquintar. Avess el da scriver in cudesch, lura na bastass be in bain betg, di el. Uschia sa regorda el d'ina dunna, ch'ha gì duas uras e 20 minutas per vegnir da Cauma (2245 m s.m.) giu Burleun (1719 m s.m.). Ma el haja gì pazienza e discurrì bler, e lura saja quai era ì.
U in auter giast, in anteriur servient da la guerra mundiala. Quel na vuleva betg vegnir instruì dad el ma vuleva simplamain avair sia cumpagnia. Uschia faschevan els excursiuns en auters territoris da skis, ed il highlight era per Aluis Cathomen, ch'el dastgava charrar quest hosp en ses auto – in Mercedes.
El aveva mintg'onn in resch nov Mercedes ed jau dastgava ir cun quel. Mez avev'jau be in VW nausch.
Ma ussa sa legra l'um da 78 onns era sin sia pensiun meritada sco scolast da skis, pertge ses biadis hajan gia dumandà da pudair ir sin pista cun lur tat. Ed era cun sia dunna po el uschia anc giudair las pistas senza la mandura uffiziala.
-
Bild 1 von 10. Il «Gigi» da Breil, Aluis Cathomen. Sa chapescha ha quai era dà l'ina u l'autra festa durant dar scola da skis. Ed uschia è el magari era vegnì numnà il «Gigi» da Breil. La foto è ca. da l'onn 1984. Bildquelle: Aluis Cathomen privat.
-
Bild 2 von 10. Ils fundaturs da la scola da skis da Breil. Venanzi Cantieni (prim manader da la scola da skis), Marcus Friberg, Aluis Cathomen e Tadeus Cathomas. Bildquelle: Aluis Cathomen privat.
-
Bild 3 von 10. La tecnica sto constar. Bildquelle: Aluis Cathomen privat.
-
Bild 4 von 10. L'entschatta da la scola da skis da Breil. Aluis è en la retscha davostiers, il segund da dretg. Bildquelle: Aluis Cathomen privat.
-
Bild 5 von 10. Buns temps era sin la sutgera. Sanester Aluis e dretg Gaudenz Cathomen. Bildquelle: Aluis Cathomen privat.
-
Bild 6 von 10. Di da skis per l‘uniun da gimnastica Breil. E dal tut sanester en la bella chautscha pinca: Aluis Cathomen. Bildquelle: Aluis Cathomen privat.
-
Bild 7 von 10. Anc adina plain schlantsch. Tgi che guarda tiers ad Aluis Cathomen na pudess betg dir ch'el ha 78 onns – il stil dad ir cun skis è anc frestgs sco el sez en ses spiert. Bildquelle: RTR.
-
Bild 8 von 10. Impurtanta teoria. Blers da ses giasts na sajan cundiziunalmain betg fitg ferms, perquai giascha era il focus sin mussar teoria. Pertge ina buna teoria munta era pli paucs sforzs sin pista. Bildquelle: RTR.
-
Bild 9 von 10. Dà giu la mondura. Uss, suenter 50 onns èsi propi a fin e la mandura vegn dada giu. Bildquelle: RTR.
-
Bild 10 von 10. In chantun deditgà ad Aluis. E l'ustaria Burleun en il territori da skis da Breil è in chantun deditgà ad Aluis per remunerà sia prestaziun d'avair fundà e dà 50 onns scola da skis. Bildquelle: RTR.