Ina gronda pastoraziun regiunala enstagl da plaivs «administraturas»: Quai è la pretensiun da Mariano Tschuor, il commember dal cussegl administrativ da la Claustra dominicana a Glion. In tschert potenzial hai quai. Vul dir, quels radund nov pertschient da la populaziun che van tenor l'Uffizi federal da statistica ina giada l'emna a messa u a predi. Sche Mariano Tschuor vegniss da concentrar quella minoritad da glieud en claustra, pudess el rimnar la muntanera che perda plaun a plaun il spiert da cuminanza, pervia da baselgias vidas en la periferia.
Mariano Tschuor fa reclama en atgna chaussa e quai raffinà. Ed el smatga sin la plaja da las plaivs territorialas. A la blera glieud è il servetsch pastoral tuttina, uschia la statistica. Las plaivs han quasi dà si il servetsch divin da la dumengia ed èn sa retratgas davos paucas festas ecclesiasticas, sco ch'ellas concedan. Ma gia il dumber dals battens è ils davos 10 onns ì marcantamain enavos. Ha quai in avegnir?
Pli pitschna raspada, tuttina gronds edifizis: Surtut per las plaivs pitschnas che han tegnì sidretg structuras grondas en il num da l'autonomia, munta il proxim pass, fusiunar. En la Foppa mussan las tendenzas da fusiunar las baselgias refurmadas sut in tetg exact quai.
Sch'ina plaiv è en l'avegnir attractiva, dependa da sias purschidas e da la glieud che promova quellas. Là èn las qualitads differentas e dependan da las persunas che s'engaschan. In bun exempel è la plaiv da Tumein-Panaduz-Razén che tschertga novas vias suenter ina crisa. Sco per exempel vegnir ensemen per in «Sunntigsnacht mit Spaghetti» per tuttas generaziuns, quai enstagl d'in predi.
Las claustras porschan tradiziunalmain ina pastoraziun spezialisada, pia ina «Seelsorge» per tgi che tschertga quella. Tar il digren da las plaivs e lur pastoraziun tradiziunala pon las claustras esser ina nova adressa. Mariano Tschuor ha chapì quai, el è era in profi da medias e communicaziun.
La secularisaziun s'avanza dapi decennis, uschia ch'igl ha en l'avegnir num: fusiunar u concentrar forzas.